சிக்கன் ரைசுக்கு டஃப் கொடுக்கும்... வெஜ் பிரியர்களும் சாப்பிடலாம்: செஃப் தீனா ரெசிபி

வழக்கமான சாதம் சலித்துவிட்டதா? ஒரு வித்தியாசமான, அதே சமயம் சுலபமாகத் தயாரிக்கக்கூடிய ஒரு உணவு வகையைத் தேடுகிறீர்களா? அப்படியானால், உருளைக்கிழங்கு கொத்து சோறு உங்களுக்கு ஒரு சிறந்த தேர்வாக இருக்கும்.

பொதுவாக சமையல் செய்யும்போது கடுகு, சீரகம், வெந்தயம் போன்ற தாளிப்புப் பொருட்களைப் பயன்படுத்துவோம். ஆனால், இந்த கொத்து சோறு ஒரு தனித்துவமான முறையில், தாளிப்பு இல்லாமல் நேரடியாக இஞ்சி பூண்டு பேஸ்ட் மற்றும் காய்ந்த மிளகாயுடன் தொடங்குகிறது. இந்த சுவையான உருளைக்கிழங்கு கொத்து சோறை வீட்டிலேயே எப்படி எளிமையாகவும், விரைவாகவும் செய்வது என்று செஃப் தீனா ஜெயாடிவி இன்ஸ்டாபக்கத்தில் கூறியிருப்பது பற்றி பார்க்கலாம்.

தேவையான பொருட்கள்:

வேகவைத்த உருளைக்கிழங்கு - தேவையான அளவு
காய்ந்த மிளகாய் - 2 (அல்லது காரத்திற்கு ஏற்ப)
இஞ்சி பூண்டு விழுது - தேவையான அளவு
வெங்காயம் - 1 (நறுக்கியது)
பச்சை மிளகாய் - 1-2 (நறுக்கியது)
கறிவேப்பிலை - ஒரு கொத்து
மஞ்சள் தூள் - சிறிதளவு
மிளகாய்த்தூள் - மிகக் குறைவான அளவு
சிக்கன் மசாலா - சிறிதளவு (சுவைக்காக)
முட்டை - 1 (விருப்பப்பட்டால்)
சாதம் - தேவையான அளவு
உப்பு - தேவையான அளவு
எண்ணெய்  

செய்முறை:

முதலில், உருளைக்கிழங்கை வேகவைத்து, தோலுரித்து, மசித்து வைத்துக் கொள்ளவும். ஒரு கடாயில் சிறிதளவு எண்ணெய் ஊற்றி சூடாக்கவும். எண்ணெய் சூடானதும், இஞ்சி பூண்டு விழுது, காய்ந்த மிளகாய் (நறுக்கியது), வெங்காயம், பச்சை மிளகாய் மற்றும் கறிவேப்பிலை ஆகியவற்றைச் சேர்த்து நன்கு வதக்கவும்.

வதங்கியதும், மசித்து வைத்துள்ள உருளைக்கிழங்கைச் சேர்த்து, கரண்டியால் நன்கு மசித்து கிளறவும்.
இதனுடன், சிறிதளவு மஞ்சள் தூள், மிகக் குறைவான மிளகாய்த்தூள், மற்றும் சிக்கன் மசாலா (சுவைக்காக) சேர்த்து நன்கு கிளறவும். தேவைப்பட்டால், இன்னும் சிறிது எண்ணெய் சேர்த்து நன்கு வதக்கவும்.

கலவை நன்கு வதங்கியதும், ஒரு முட்டையை உடைத்து ஊற்றி, அதன் மேல் சிறிதளவு உப்பு தூவி, நன்கு கலந்து விடவும். முட்டை 60-70% வெந்தால் போதும். இப்போது, வேகவைத்த சாதத்தைச் சேர்த்து, கொத்து பரோட்டா செய்வது போல, கரண்டியால் நன்கு கொத்தி விடவும். மசாலா சாதத்துடன் நன்கு கலக்கும் வரை கொத்த வேண்டும்.

அவ்வளவுதான், சுவையான மற்றும் காரசாரமான உருளைக்கிழங்கு கொத்து சோறு தயார். இதை அப்படியே சூடாகப் பரிமாறலாம். 

View this post on Instagram

A post shared by Jaya TV (@jayatvofficial)