அரிசி, ரவை எதுவும் வேணாம்... மொறு மொறு தோசை இப்படி செய்யுங்க!

சமூக வலைதளங்களில் வைரலாகி வரும் இந்த ஆரோக்கியமான பருப்பு தோசையை நீங்களும் உங்கள் வீட்டில் எளிதாகச் செய்யலாம். இது அரிசி மற்றும் ரவை சேர்க்காமல், முழுவதுமாக பருப்பு வகைகளைக் கொண்டு செய்யப்படுவதால், மிகவும் மொறுமொறுப்பாகவும், புரதச் சத்து நிறைந்ததாகவும் இருக்கும். இதை எப்படி செய்வது என்று சய்னுஸ் டைரி இன்ஸ்டாகிராம் பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

கடலைப்பருப்பு - 1 கப்
துவரம்பருப்பு - 1 கப்
பாசிப்பருப்பு - 1 கப்
சீரகம் - 1 தேக்கரண்டி
பச்சை மிளகாய் - 2-3 
இஞ்சி - ஒரு சிறிய துண்டு
நறுக்கிய வெங்காயம் - 1/2 கப்
கறிவேப்பிலை - சிறிதளவு
கொத்தமல்லி தழை - சிறிதளவு
உப்பு - தேவையான அளவு
எண்ணெய் - தோசை சுடுவதற்கு

செய்முறை:

முதலில், கடலைப்பருப்பு, துவரம்பருப்பு மற்றும் பாசிப்பருப்பு ஆகிய மூன்று பருப்புகளையும் சம அளவில் எடுத்துக் கொள்ளவும். அவற்றை நன்றாகக் கழுவி, 3 முதல் 4 மணி நேரம் வரை தண்ணீரில் ஊற வைக்கவும். ஊறிய பருப்புகளை தண்ணீரை வடிகட்டி, ஒரு மிக்ஸி ஜாரில் சேர்க்கவும். அத்துடன் பச்சை மிளகாய், இஞ்சி மற்றும் சீரகம் சேர்த்து, சிறிதளவு தண்ணீர் ஊற்றி, நைசாக அரைத்துக் கொள்ளவும். மாவு தோசை மாவு பதத்தில் இருக்க வேண்டும். மிகவும் நீராக இருக்கக் கூடாது.

அரைத்த மாவை ஒரு பாத்திரத்தில் மாற்றி, பொடியாக நறுக்கிய வெங்காயம், கறிவேப்பிலை, கொத்தமல்லி தழை மற்றும் தேவையான அளவு உப்பு சேர்த்து நன்கு கலக்கவும். இப்போது, ஒரு தோசை கல்லை சூடாக்கி, சிறிதளவு எண்ணெய் தடவவும். ஒரு கரண்டி மாவை தோசை கல்லில் ஊற்றி, மெல்லிய தோசையாக பரப்பவும்.

View this post on Instagram

A post shared by Sainaba Beebi (@sainus_diary)

தோசையின் ஓரங்களில் சிறிதளவு எண்ணெய் ஊற்றி, ஒருபுறம் நன்றாக வெந்ததும் திருப்பிப் போட்டு, மறுபுறமும் சிவந்து வரும் வரை வேக வைத்து எடுக்கவும். இந்த சத்தான மற்றும் சுவையான பருப்பு தோசையை, தேங்காய் சட்னி, கார சட்னி அல்லது சாம்பாருடன் சூடாகப் பரிமாறலாம். இது காலை உணவு அல்லது இரவு உணவுக்கு ஒரு சிறந்த தேர்வாகும்.