மொறு மொறு பஜ்ஜிக்கு இந்தப் பருப்பு; உருளை சீக்கிரம் வேக அந்த நிற பொடி... இன்றைய டாப்ஸ் குக்கிங் டிப்ஸ்!

உங்கள் சமையலில் சில எளிய மாற்றங்களைச் செய்தாலே போதும் உணவின் சுவையையும் தரத்தையும் மேம்படுத்தலாம். அப்படியாக எப்போதும் நியாபகம் வைத்துக்கொள்ள உதவும் சில டிப்ஸ்களை பற்றி பார்க்கலாம்.

மெதுவான உளுந்து வடை: உளுந்து வடை மாவுடன், சிறிது ஊறவைத்த பாசிப்பருப்பை (பயத்தம் பருப்பு) சேர்த்து வடை சுட்டால், வடை மிகவும் மென்மையாகவும் சுவையாகவும் இருக்கும்.

மொறுமொறு பஜ்ஜி: பஜ்ஜி மாவுடன், இரண்டு ஸ்பூன் ஊறவைத்து அரைத்த உளுத்தம் பருப்பை கலந்து பஜ்ஜி செய்தால், பஜ்ஜி மொறுமொறுப்பாகவும் சுவையாகவும் அமையும்.

ருசியான தயிர் வடை: தயிர் வடைக்கு மாவு அரைக்கும்போது, உளுத்தம் பருப்புடன் ஐந்து முந்திரிப் பருப்புகளையும் ஊறவைத்து அரைத்துச் சேர்த்தால், வடை மிருதுவாகவும் ருசியாகவும் இருக்கும்.

உருளைக்கிழங்கு வேகும் முறை: உருளைக்கிழங்கை விரைவாக வேகவைக்க, வேகவைக்கும் நீரில் சிறிதளவு மஞ்சள் தூளையும், எண்ணெயையும் சேர்க்கவும்.

சுவையான ஜவ்வரிசி வடகம்: ஜவ்வரிசி வடகம் தயாரிக்கும்போது, சிறிதளவு எள், சீரகம், பெருங்காயத்தூள், பொட்டுக்கடலை ஆகியவற்றைச் சேர்த்து செய்தால், பொரித்து சாப்பிடும்போது தட்டை போல சுவையாகவும் மணமாகவும் இருக்கும்.

தக்காளி சூப்பிற்கு ஒரு மாற்று: தக்காளி சூப்பில் சேர்க்க பிரெட் துண்டுகள் இல்லையெனில், ஜவ்வரிசி வடகம் இருந்தால், அதை பொரித்து சூப்பில் சேர்த்து சாப்பிடலாம்.

பீட்ரூட் கூட்டு: பீட்ரூட்டின் தோலை நீக்கி, உளுத்தம் பருப்பு, மிளகாய், பெருங்காயம் ஆகியவற்றை வறுத்து, தேங்காய் சேர்த்து அரைத்து, அதனுடன் பீட்ரூட்டை சேர்த்து கூட்டு செய்தால், சப்பாத்திக்கு தொட்டுக்கொள்ள சுவையாக இருக்கும். 

மணம் நிறைந்த சாதம்: சாதம் சமைக்கும்போது, சமைக்கும் நீரில் ஒரு டீஸ்பூன் நெய் மற்றும் ஒரு ஏலக்காய் சேர்த்தால், சாதம் மணமாகவும் சுவையாகவும் இருக்கும்.

கறிவேப்பிலை வாசம்: கறிவேப்பிலையை தாளிக்கும்போது, அடுப்பை அணைப்பதற்கு முன் சேர்த்தால் அதன் மணம் நீடிக்கும்.