ஈரலில் கொழுப்பை கரைக்க இந்தக் கீரை; உங்க வீட்டு அருகிலேயே கிடைக்கும்: மருத்துவர் சிவராமன்

இன்றைய சூழலில் பெரும்பாலானவர்கள் ஃபேட்டி லிவர் என்று அறியப்படுகிற ஈரலைச் சுற்றி கொழுப்பு படியும் பாதிப்பால் அவதிப்பபடுகின்றனர். அது குறித்த பல்வேறு தகவல்களை ஹெல்தி தமிழ்நாடு என்ற யூடியூப் சேனலில் மருத்துவர் சிவராமன் தெரிவித்துள்ளார்.

கரிசலாங்கண்ணி மற்றும் கீழாநெல்லி ஆகிய இரண்டும் கொழுப்பு படிந்த ஈரல் நோய்க்குச் சிறந்த மருந்தாக இருக்கின்றன. இவற்றை உணவுடன் சேர்த்துக்கொள்ளலாம் அல்லது கஷாயமாக அருந்தலாம். கீழாநெல்லி குறிப்பாக மஞ்சள் காமாலைக்கு மருந்தாக அறியப்பட்டாலும், ஈரலைப் பாதுகாப்பதிலும் முக்கிய பங்கு வகிக்கிறது.

சின்ன வெங்காயம் மற்றும் பூண்டு ஆகியற்றை உணவில் சேர்த்துக்கொள்வது நன்மையை தரும். குறிப்பாக சின்ன வெங்காயத்தை பச்சையாக சாப்பிடுவது, இரத்தத்தில் உள்ள கொழுப்பைக் குறைக்கவும், ஈரலில் கொழுப்பு சேர்வதைத் தடுக்கவும் உதவும். இவற்றில் உள்ள அல்லிசின் இதய ஆரோக்கியத்திற்கும், இரத்த நாளங்களில் கொழுப்பு படிவதை தடுப்பதற்கும் உதவும். இது தவிர வெந்தயத்தையும் உணவில் சேர்த்துக் கொள்ளலாம்.

அசைவ உணவுகளில் மீன் சாப்பிடலாம். ஆனால், இறைச்சி வகைகளை அதிகமாக எடுப்பதை தவிர்க்க முயற்சி செய்ய வேண்டும். குறிப்பாக உடலுழைப்பு இல்லாதவர்கள் இவற்றைத் தவிர்ப்பது நல்லது. இவை கெட்ட கொழுப்பை அதிகரித்து ஈரல் செயல்பாட்டை பாதிக்கும்.

கொழுப்பு அதிகமாக சேர்வதால் ஈரல் சுருக்க நோய் ஏற்படலாம். இதனால் இரத்தத்தில் உள்ள தட்டு அணுக்களின் எண்ணிக்கை குறையும். இது உள் இரத்தப்போக்கு மற்றும் மூளை செயல்பாட்டை பாதிக்கும். மேலும், செரிமானத்திற்கு ஈரல் மிகவும் முக்கியம் என்று மருத்துவர் சிவராமன் தெரிவித்துள்ளார். எனவே, ஈரலை ஆரோக்கியமாக பாதுகாக்க வேண்டும்.