காலை கடன் கலகலன்னு போக இனி மாத்திரை வேணாம்; இந்தப் பொடியில் 1/2 ஸ்பூன் எடுத்துக்கோங்க: டாக்டர் சிவராமன்

உணவே மருந்து என்ற அடிப்படையில் நமது முன்னோர்கள் வாழ்ந்து வந்தனர். ஆனால், உணவு முறை மாற்றம் மற்றும் வாழ்க்கை முறை மாற்றத்தின் காரணமாக நாம் சாப்பிடும் பொருட்களில் இருந்தே சில பிரச்சனைகள் உருவாகும் அவல நிலை இன்று ஏற்பட்டுள்ளது.

இது போன்ற பிரச்சனைகளில் இருந்து நம்மை தற்காத்துக் கொள்ள இயற்கையான முறையில் மருந்துகளை எடுத்துக் கொள்ளலாம். இவற்றின் மூலம் பக்க விளைவுகள் மற்றும் ஒவ்வாமை உண்டாகும் பாதிப்பு குறைவாக இருக்கும். அந்த வகையில் ஒரு மருத்துவ பொடி குறித்து மருத்துவர் சிவராமன் தெரிவித்துள்ளார்.

நம் எல்லோர் வீட்டிலும் திரிபலா பொடி அவசியம் இருக்க வேண்டும் என்று மருத்துவர் சிவராமன் அறிவுறுத்துகிறார். குறிப்பாக, ஒரு வீட்டில் வயதானவர்கள் இருந்தால், கண்டிப்பாக திரிபலா பொடியை அவர்களது வீட்டில் வைத்திருக்க வேண்டும் என்று அவர் குறிப்பிட்டுள்ளார்.

கடுக்காய், நெல்லிக்காய் மற்றும் தான்றிக்காய் ஆகிய மூன்று பொருட்களை ஒன்றாக சேர்த்து பொடியாக பயன்படுத்துவதால், இதனை திரிபலா பொடி என்று கூறுகிறார்கள். இந்த திரிபலா பொடியை, இரவு நேரத்தில் சுமார் அரை ஸ்பூன் அளவிற்கு எடுத்து தண்ணீரில் கலந்து குடிக்கலாம் என்று மருத்துவர் சிவராமன் கூறுகிறார்.

இப்படி, தொடர்ச்சியாக இதனை எடுத்துக் கொள்ளும் போது மலத்தை எளிதாக கழிக்க முடியும் என்று அவர் தெரிவித்துள்ளார். நடுத்தர வயதினர் மற்றும் வயதானவர்களுக்கு இன்றைய சூழலில் மலச்சிக்கல் பிரச்சனை இருக்கிறது. மலச்சிக்கலை போக்குவதற்கு நிறைய இரசாயனங்கள் சேர்க்கப்பட்ட மருந்துகளை பலர் எடுத்துக் கொள்கின்றனர்.

அதற்கு பதிலாக இயற்கையான முறையில் திரிபலா பொடியை எடுத்துக் கொள்ளலாம் என்று மருத்துவர் சிவராமன் வலியுறுத்துகிறார். இதேபோல், உடலில் நோய் எதிர்ப்பு ஆற்றலை அதிகரிக்கும் தன்மை திரிபலா பொடிக்கு இருக்கிறது. 

நன்றி - Healthy Tamilnadu Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.