சராசரி வயது 103... பர்பிள் கலரில் இந்தக் கிழங்கு கிடைச்சா விடாதீங்க: மருத்துவர் சிவராமன்

உருளைக்கிழங்கைத் தவிர்த்து, பல கிழங்குகள் உடலுக்கு நன்மை பயப்பவை என்று நிபுணர்கள் கூறுகின்றனர். குறிப்பாக, சக்கரவள்ளி கிழங்கு (Sweet Potato) குறித்து உலக அளவில் ஆய்வுகள் மேற்கொள்ளப்பட்டு வருகின்றன. ஆரஞ்சு நிற சக்கரவள்ளி கிழங்கை வேகவைத்து சாப்பிடும்போது, அதன் கிளைசெமிக் இண்டெக்ஸ் குறைவதாகக் கண்டறியப்பட்டுள்ளது. இது உருளைக்கிழங்கை விட மெதுவாக ரத்தத்தில் சர்க்கரையை ஏறும் தன்மையைக் கொண்டுள்ளது.

சமீபத்திய கண்டுபிடிப்புகளில், பர்பிள் ஸ்வீட் பொட்டேட்டோ தனிச்சிறப்பு வாய்ந்தது. ஜப்பானுக்கு அருகிலுள்ள தென் பசிபிக் கடலில் அமைந்துள்ள ஒகினாவா தீவில் வசிக்கும் மக்கள் உலகிலேயே அதிக ஆயுட்காலம் கொண்டவர்கள் என அறிவிக்கப்பட்டுள்ளனர். 

அங்கு சராசரி ஆயுட்காலம் 103 வயதாகும், மேலும் 112 வயது வரை மரணங்கள் ஏற்படுகின்றன. இவர்களின் ஆரோக்கியமான முதுமைக்குக் காரணம், அவர்களின் உணவில் பழங்கள், பாசி, மீன்கள் மற்றும் மிக முக்கியமாக பர்பிள் ஸ்வீட் பொட்டேட்டோ ஆகியவை இடம்பெற்றுள்ளன. இந்த கிழங்கின் முக்கியத்துவம் இன்று உலகம் முழுவதும் அறியப்பட்டு, பர்பிள் ஸ்வீட் பொட்டேட்டோ கிடைப்பது அதிகரித்து வருகிறது.

நமது தமிழகத்தின் தெற்கத்தி பகுதிகளான திருநெல்வேலி மாவட்டத்தில் சிறுகிழங்கு என்ற ஒரு தனித்துவமான கிழங்கு உண்டு. இது சிறிய உருளைக்கிழங்கு அளவிலேயே இருக்கும். இக்கிழங்கை பெரும்பாலும் தைப்பொங்கல் நாளில் படையல் வைத்து, பொங்கலுடன் சேர்த்து உண்பது வழக்கம். இக்கிழங்கு மிகவும் சுவையாக இருப்பதுடன், சர்க்கரை நோயாளிகளுக்கும் உகந்தது என்று இன்றைய அறிவியல் உலகம் கண்டறிந்துள்ளது.

சக்கரவள்ளி கிழங்கு, பர்பிள் சர்க்கரைவள்ளி கிழங்கு போன்ற கிழங்குகள் உடலுக்கு நன்மை பயப்பவை. ஆனால், இவை அனைத்தையும் வேகவைத்து வீட்டில் சாப்பிடுவது சிறந்ததாகும். நமது பகுதியில் பலர், கிழங்குகளை சிப்ஸ் அல்லது பஜ்ஜி வடிவில் உட்கொள்ள விரும்புகின்றனர். சிப்ஸாகவோ அல்லது பஜ்ஜியாகவோ மாற்றும்போது, அவற்றுடன் கூடுதலாகச் சேர்க்கப்படும் உப்பு மற்றும் மிளகாய்த்தூள் உடலுக்குக் கேடு விளைவிக்கும்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.