ஈவ்னிங் ஸ்நாக்ஸ் ரெசிபி: ஹெல்தி அண்ட் டேஸ்டி லட்டு

அவல் லட்டு என்பது அவல், வேர்க்கடலை மற்றும் வெல்லம் போன்ற எளிமையான பொருட்களைக் கொண்டு விரைவாகத் தயாரிக்கக்கூடிய ஒரு பாரம்பரிய இந்திய இனிப்பு ஆகும். பண்டிகைக் காலங்கள் அல்லது விருந்தினர்களுக்கு பரிமாறும்போது, இந்த லட்டு ஒரு சிறந்த தேர்வாக அமைகிறது. இது சுவையாக இருப்பதுடன், ஆற்றல் நிறைந்த ஒரு ஆரோக்கியமான நொறுவைப்பண்டமாகவும் உள்ளது. இதனை பெரியவர்கள் முதல் சிறியவர்கள் வரை அனைவரும் விரும்பிச் சாப்பிடுவார்கள். இதனை எப்படி செய்வது என்று ஹோம் குக்கிங் தமிழ் யூடியூப் பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

வேர்க்கடலை - கால் கப்
பொட்டுக்கடலை - கால் கப்
கெட்டி அவல் - ஒரு கப்
பொடித்த வெல்லம் - முக்கால் கப்
தண்ணீர் - முக்கால் கப்
துருவிய தேங்காய் - அரை கப்
நெய் - இரண்டு டேபிள் ஸ்பூன்
முந்திரி, திராட்சை - சிறிதளவு
ஏலக்காய்த்தூள் - ஒரு டீஸ்பூன்

செய்முறை:

முதலில், ஒரு கடாயை மிதமான சூட்டில் வைத்து, கால் கப் வேர்க்கடலையை இரண்டு நிமிடங்களுக்கு வறுக்கவும். வேர்க்கடலை வறுபட்டதும், அதனுடன் கால் கப் பொட்டுக்கடலை மற்றும் ஒரு கப் கெட்டி அவலைச் சேர்த்து, நல்ல மணம் வரும் வரை வறுத்து எடுக்கவும். பின்னர், இந்த கலவையை ஆறவிடவும்.

அடுத்து, வறுத்த வேர்க்கடலை, பொட்டுக்கடலை, மற்றும் அவல் கலவையை ஒரு மிக்ஸியில் சேர்த்து, ரவை பதத்திற்கு அரைத்துக்கொள்ளவும். பிறகு, சிறிது நெய் ஊற்றி, முந்திரி மற்றும் திராட்சையை பொன்னிறமாக வறுத்து, தனியாக எடுத்து வைக்கவும்.

அதே கடாயில், முக்கால் கப் தண்ணீர் மற்றும் முக்கால் கப் பொடித்த வெல்லம் சேர்த்து, வெல்லம் நன்கு கரையும் வரை கொதிக்க விடவும். வெல்லப்பாகு நன்கு கொதித்தவுடன், அரைத்து வைத்த பொடி, துருவிய தேங்காய், மற்றும் ஏலக்காய்த்தூள் சேர்த்து நன்கு கிளறவும்.

கடைசியாக, வறுத்த முந்திரி, திராட்சை மற்றும் மீதமுள்ள நெய் சேர்த்து, நன்றாகக் கலக்கவும். கலவையை சிறிது நேரம் ஆறவிட்டு, வெதுவெதுப்பான சூட்டில் இருக்கும்போது, சிறு சிறு உருண்டைகளாகப் பிடித்தால், சுவையான அவல் லட்டு தயார்.