/indian-express-tamil/media/media_files/2025/07/15/kitchen-tips-2025-07-15-20-14-19.jpg)
சமையல் என்பது ஒரு கலை. அதுவும் வீட்டு சமையலில் சின்னச் சின்ன நுட்பங்களை கையாண்டால், உணவின் சுவை மேம்படும். சில சமயங்களில் நாம் எதிர்பார்த்தபடி உணவு அமையாமல் போகலாம். அத்தகைய நேரங்களில், இந்த எளிய சமையல் குறிப்புகள் உங்களுக்கு நிச்சயம் கை கொடுக்கும்.
சேமியா, ஜவ்வரிசி அல்லது அரிசி பாயசம் சில நேரங்களில் அதிகம் தண்ணியாகிவிட்டால் கவலைப்பட வேண்டாம். இதற்கு ஒரு எளிய தீர்வு உள்ளது. வீட்டில் இருக்கும் ஓட்ஸ் சிறிது எடுத்து, பாயசத்தில் சேர்த்து இரண்டு நிமிடம் கொதிக்க விடுங்கள். பின்னர் அடுப்பை அணைத்து விடலாம். ஓட்ஸ் பாயசத்தில் உள்ள அதிகப்படியான திரவத்தை உறிஞ்சி, அதனை சரியான பதம் வரும் வரை கெட்டியாக்கிவிடும். இது பாயசத்தின் சுவையையும் பாதிக்காது.
மிருதுவான, பட்டுப் போன்ற தோசைகள் சுட வேண்டும் என்பது பலரின் ஆசை. இதற்கு ஒரு ரகசியம் உள்ளது. தோசை மாவு அரைக்க பச்சரிசியை ஊறப்போடும்போது, வழக்கமான தண்ணீருக்கு பதிலாக வெந்நீரை ஊற்றி ஊறவையுங்கள். பின்னர் மாவை அரைத்து தோசை வார்த்தால், அது மிகவும் மிருதுவாகவும், பட்டுப் போலவும் வரும். இந்த எளிய மாற்றம் தோசையின் அமைப்பை முற்றிலும் மாற்றிவிடும்.
சம்பா கோதுமை மாவில் உப்புமா செய்யும்போது, கடைசியாக நாம் செய்யும் ஒரு சின்ன மாற்றம் உப்புமாவின் சுவையை பல மடங்கு அதிகரிக்கும். உப்புமாவை செய்து முடிக்கும் நேரத்தில், இரண்டு ஸ்பூன் தேங்காய் எண்ணெயை விட்டு, நன்கு கலந்து இறக்கி வைக்கவும். இந்த தேங்காய் எண்ணெய், உப்புமாவிற்கு ஒரு தனித்துவமான சுவையை கொடுத்து சாப்பிட தூண்டும்.
காலையில் சத்தான மற்றும் சுவையான தோசை சாப்பிட விரும்புகிறீர்களா? அப்படியென்றால், அரிசியையும், பயத்தம் பருப்பையும் ஊற வைத்து ஒன்றாக அரைத்துக் கொள்ளுங்கள். பின்னர் தேவையான அளவு உப்பு மற்றும் சிறிது பெருங்காயத்தூள் சேர்த்து தோசை வார்த்தால், மிகவும் சத்தான மற்றும் சுவையான தோசை தயார். இது உடல் நலத்திற்கு மிகவும் நல்லது.
எப்போதும் ஒரே மாதிரியான சாம்பார் செய்து அலுத்துப் போய்விட்டதா? அப்படியானால், இந்த வெள்ளரிக்காய் சாம்பாரை ஒருமுறை முயற்சி செய்து பாருங்கள். நடுத்தர அளவிலான வெள்ளரிக்காயை பெரிய துண்டுகளாக வெட்டி சாம்பாரில் சேர்த்து சமைத்துப் பாருங்கள். இது பரங்கிக்காய் சாம்பார் போலவே ஒரு இனிப்புச் சுவையையும், தனித்துவமான மணத்தையும் கொடுக்கும். இதில் அதிகம் புளி சேர்ப்பதை தவிர்த்து விடுங்கள். ஏனெனில் வெள்ளரிக்காயின் இயற்கையான சுவை குறைந்துவிடும்.
இந்த சமையல் குறிப்புகள் உங்கள் அன்றாட சமையலை சுவாரஸ்யமாக்குவதுடன், உணவுப் பொருட்களின் சுவையையும் மேம்படுத்த உதவும்.
Stay updated with the latest news headlines and all the latest Lifestyle news. Download Indian Express Tamil App - Android or iOS.