இந்த வாரம் லஞ்ச் செய்ய ரெடியா? - பெற்றோர்களே இதை கவனிங்க!

மதிய லஞ்ச்க்கு என்ன சமைக்கலாம் என யோசிக்கிறீர்களா? அவசரமான காலை நேரத்தில் எளிமையாகவும், விரைவாகவும் செய்யக்கூடிய ஒரு சத்தான உணவுதான் இந்த கேரட் சாதம். காய்கறிகள் சாப்பிடத் தயங்கும் குழந்தைகள்கூட இதை விரும்பி சாப்பிடுவார்கள். இதை எப்படி செய்வது என்று ரேகாஸ்குசினா யூடியூப் பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

துருவிய கேரட் - 1 கப்
வெங்காயம் - 1 (நறுக்கியது)
கடுகு - 1/2 டீஸ்பூன்
உளுத்தம் பருப்பு - 1/2 டீஸ்பூன்
கடலை பருப்பு - 1/2 டீஸ்பூன்
முந்திரி பருப்புகள் - தேவையான அளவு
பச்சை மிளகாய் - 1 அல்லது 2 
கறிவேப்பிலை - சிறிதளவு
மஞ்சள் தூள் - 1/2 டீஸ்பூன்
மிளகாய் தூள் - 1/2 டீஸ்பூன் 
உப்பு - தேவையான அளவு
எலுமிச்சை சாறு - 1 டீஸ்பூன்
எண்ணெய் - 2 டீஸ்பூன்
கொத்தமல்லி இலைகள்

செய்முறை:

ஒரு கடாயில் எண்ணெய் ஊற்றி, சூடானதும் கடுகு, உளுத்தம் பருப்பு, கடலை பருப்பு மற்றும் முந்திரி பருப்புகள் சேர்த்து பொன்னிறமாக வறுக்கவும். இப்போது, நறுக்கிய பச்சை மிளகாய், கறிவேப்பிலை மற்றும் வெங்காயம் சேர்த்து, வெங்காயம் பொன்னிறமாக மாறும் வரை நன்கு வதக்கவும்.

பிறகு, துருவிய கேரட்டை சேர்த்து சுமார் இரண்டு நிமிடங்கள் நன்கு வதக்கவும். கேரட் வதங்கியதும், உப்பு, மஞ்சள் தூள் மற்றும் மிளகாய் தூள் சேர்த்து, மசாலாவின் பச்சை வாசனை போகும் வரை நன்கு கிளறி விடவும். இறுதியாக, ஏற்கெனவே சமைத்து வைத்திருக்கும் சாதத்தை சேர்த்து, அதனுடன் எலுமிச்சை சாறு கலந்து, மசாலா சாதத்துடன் நன்கு கலக்குமாறு மெதுவாகக் கிளறவும்.

சுவையான கேரட் சாதத்தை ஒரு கிண்ணத்தில் மாற்றி, கொத்தமல்லி இலைகளை தூவி அலங்கரித்து பரிமாறலாம். இந்தக் கேரட் சாதத்தை வடாம் அல்லது சிப்ஸுடன் சேர்த்து சாப்பிடலாம். இது மதிய லஞ்ச்க்கு ஏற்ற ஒரு சுலபமான மற்றும் ஆரோக்கியமான தேர்வாகும். இந்த கேரட் சாதம் ஈஸியாக செய்து விடலாம். இதில் கேரட்டுக்கு பதிலாக வேறு எதாவது காய் கூட சேர்த்து செய்யலாம். அதுவும் சுவையாக இருக்கும்.