டக்குன்னு ஒரு லஞ்ச் ரெசிபி: இப்படி செஞ்சா செம்ம ஈஸி!

மதிய உணவு என்ன செய்வது என்ற கேள்வி தினமும் அனைவரையும் குழப்பத்தில் ஆழ்த்தும். சில நேரங்களில் சாதத்திற்கு சைட் டிஷ் என்ன வைப்பது என்று தெரியாமல் குழம்பு அல்லது ரசம் என சாதாரணமாக முடித்துவிடுவோம். ஆனால், சோயா குருமா செய்வது மிகவும் எளிது என்பதோடு, இதன் சுவையும் அருமையாக இருக்கும். குறைந்த நேரத்தில், ஆரோக்கியமான மற்றும் சுவையான உணவை செய்ய விரும்புபவர்களுக்கு இந்த சோயா குருமா ஒரு சிறந்த தேர்வு. சோயாவில் புரதம் அதிகமாக இருப்பதால், இது உடலுக்கு மிகவும் நல்லது. வாங்க, எளிமையான முறையில் இந்த சுவையான சோயா குருமாவை எப்படி செய்வது என்று ரேகாஸ் குசினா இன்ஸ்டா பக்கத்தில் செய்து காட்டியிருப்பது பற்றி பார்க்கலாம். 

தேவையான பொருட்கள்:

சோயா சங்ஸ் - 1 கப்
வெங்காயம் - 1 (நறுக்கியது)
தக்காளி - 1 (நறுக்கியது)
இஞ்சி பூண்டு விழுது - 1 தேக்கரண்டி
தேங்காய் - கால் கப் (துருவியது)
கசகசா - 1 தேக்கரண்டி
முந்திரி - 5-6
கரம் மசாலா - அரை தேக்கரண்டி
மிளகாய் தூள் - 1 தேக்கரண்டி
தனியா தூள் - 1.5 தேக்கரண்டி
மஞ்சள் தூள் - கால் தேக்கரண்டி
பிரியாணி இலை - 1
பட்டை - சிறிய துண்டு
ஏலக்காய் - 1
கிராம்பு - 1
எண்ணெய் - 2 தேக்கரண்டி
உப்பு - தேவையான அளவு
கொத்தமல்லி இலை - சிறிதளவு

செய்முறை:

முதலில், சோயா சங்ஸை சூடான நீரில் 10-15 நிமிடங்கள் ஊறவைத்து, பின் நீரை பிழிந்து எடுத்து தனியாக வைக்கவும். ஒரு கடாயில் எண்ணெய் ஊற்றி, பட்டை, கிராம்பு, ஏலக்காய், பிரியாணி இலை போட்டு தாளிக்கவும். பிறகு, நறுக்கிய வெங்காயத்தை சேர்த்து பொன்னிறமாக வதக்கவும்.

இஞ்சி பூண்டு விழுது சேர்த்து, பச்சை வாசனை போகும் வரை வதக்கவும். அடுத்து, நறுக்கிய தக்காளியை சேர்த்து குழைய வதக்கவும்.அதனுடன், மிளகாய் தூள், தனியா தூள், மஞ்சள் தூள் மற்றும் கரம் மசாலா சேர்த்து நன்றாக கலக்கவும். தேங்காய், கசகசா மற்றும் முந்திரியை சிறிது தண்ணீர் சேர்த்து அரைத்து விழுதாக்கிக் கொள்ளவும்.

View this post on Instagram

A post shared by Rekha S (@rekhascucina)

இந்த விழுதை மசாலாவுடன் சேர்த்து நன்கு கலந்து, தேவையான அளவு தண்ணீர் மற்றும் உப்பு சேர்த்து கொதிக்க விடவும். கடைசியாக, பிழிந்து வைத்த சோயா சங்ஸ் மற்றும் கொத்தமல்லி இலைகளை சேர்த்து 5-7 நிமிடங்கள் குறைந்த தீயில் வேக வைக்கவும். இப்போது சுவையான சோயா குருமா தயார். இதை சாதம், சப்பாத்தி அல்லது இட்லி தோசைக்கும் சேர்த்து சாப்பிடலாம்.