உருளை வித் வெங்காயம்... டேஸ்டி, ஈஸி லஞ்ச் ரெசிபி!

பிள்ளைகளுக்கு தினமும் ஒரு புதுமையான மற்றும் சுவையான லஞ்ச் செய்து கொடுப்பது என்பது அம்மாக்களுக்கு ஒரு சவாலான காரியம். அந்த வரிசையில், எளிமையானதாகவும் அதே சமயம் குழந்தைகளும் விரும்பி சாப்பிடும் வகையிலும் இந்த உருளைக்கிழங்கு சாதத்தை நீங்கள் செய்து பார்க்கலாம். இது வெறும் 5 நிமிடங்களில் தயார் செய்யக்கூடிய ஒரு சுலபமான ரெசிபி என்பதால், காலை அவசரத்தில் இது உங்களுக்கு மிகவும் உதவியாக இருக்கும். இதை எப்படி செய்வது என்று மாம் ஆஃப் பாய்ஸ் இன்ஸ்டா பக்கத்தில் கூறியிருப்பது பற்றி பார்ப்போம்.

தேவையான பொருட்கள்:

எண்ணெய்
கடுகு
கடலைப்பருப்பு
கறிவேப்பிலை
நறுக்கிய வெங்காயம்
நறுக்கிய உருளைக்கிழங்கு
உப்பு
மஞ்சள் பொடி
பெருங்காயத்தூள்
மிளகாய்த்தூள்
மல்லித்தூள்
கரம் மசாலா
சீரகத்தூள்
சாதம்

செய்முறை:

முதலில் ஒரு கடாயில் சிறிதளவு எண்ணெய் ஊற்றி, கடுகு, கடலைப்பருப்பு, கறிவேப்பிலை மற்றும் நறுக்கிய வெங்காயத்தை சேர்த்து, வெங்காயம் பொன்னிறமாகும் வரை நன்கு வதக்க வேண்டும். அதன் பிறகு, நறுக்கிய உருளைக்கிழங்கு, தேவையான அளவு உப்பு, மஞ்சள் தூள் மற்றும் பெருங்காயத்தூள் சேர்த்து, உருளைக்கிழங்கு மென்மையாகும் வரை நன்கு வதக்கவும்.

உருளைக்கிழங்கு வதங்கியதும், மிளகாய்த்தூள், மல்லித்தூள், கரம் மசாலா மற்றும் சீரகத்தூள் ஆகியவற்றைச் சேர்த்து, குறைந்த தீயில் பச்சை வாசம் போகும் வரை வதக்கவும். கடைசியாக, ஏற்கனவே வடித்து ஆறவைத்த சாதத்தைச் சேர்த்து, மசாலா சாதத்துடன் நன்கு கலக்கும் வரை மெதுவாக கிளறி பரிமாறவும்.

View this post on Instagram

A post shared by Vaishalibalachandar (@mom_of_boysvaishu)

இந்த உருளைக்கிழங்கு சாதம் சுவையானது மட்டுமல்ல, குழந்தைகளும் விரும்பி உண்ணும் வகையில் இருக்கும். இது எளிமையான செய்முறை என்பதால், வாரத்தில் ஒரு நாளாவது இந்த சுவையான ரெசிபியை உங்கள் குழந்தைகளுக்கு செய்து கொடுத்து அனுப்புங்கள். வேண்டாம் என்று சொல்லாமல் பாக்ஸ் முழுவதையும் காலி செய்து விடுவார்கள். 

உருளைக்கிழங்கில் பொட்டாசியம், வைட்டமின் சி மற்றும் வைட்டமின் பி6 போன்ற அத்தியாவசிய ஊட்டச்சத்துக்கள் நிறைந்துள்ளன. இவை குழந்தைகளின் வளர்ச்சிக்கும், நோய் எதிர்ப்பு சக்திக்கும் உதவும். இந்த ரெசிபியை வெறும் 5 நிமிடங்களில் தயார் செய்துவிடலாம் என்பதால், பிள்ளைகளின் லஞ்ச் பாக்ஸிற்கு சுவையாக இருக்கும்.