வட்ட வட்டமாக முறுக்கு... 4 நாள் ஸ்நாக்ஸ் செலவு மிச்சம்!

முறுக்கு என்பது தென்னிந்தியாவில் மிகவும் பிரபலமான ஒரு பாரம்பரிய பலகாரம். இது பொதுவாக பண்டிகை காலங்களிலும், மாலை நேர சிற்றுண்டியாகவும் தயாரிக்கப்படுகிறது. முறுக்கு செய்வதற்கு அதிக நேரம் பிடிக்கும் என்று பலர் நினைப்பார்கள், ஆனால் இந்த செய்முறையில் இன்ஸ்டன்ட் முறுக்கை மிக எளிதாகவும், சுவையாகவும் செய்யலாம். இதை எப்படி செய்வது என்று மாயாஸ்கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

அரிசி மாவு: 2 கப்
பொட்டுக்கடலை: 1/2 கப்
எள்: 1 டீஸ்பூன்
பெருங்காயத்தூள்: சிறிதளவு
உப்பு: தேவையான அளவு
வரமிளகாய்: காரத்திற்கு ஏற்ப
எண்ணெய்: 1 டேபிள்ஸ்பூன்
வெதுவெதுப்பான தண்ணீர்: தேவையான அளவு

செய்முறை:

முதலில், ஒரு மிக்ஸி ஜாரில் 1/2 கப் பொட்டுக்கடலை எடுத்து, அதனை நன்கு அரைத்து பொடியாக சலித்து வைத்துக் கொள்ளவும். இந்த பொட்டுக்கடலை மாவு முறுக்குக்கு நல்ல மொறுமொறுப்பைக் கொடுக்கும். இப்போது, ஒரு பெரிய பாத்திரத்தில் 2 கப் அரிசி மாவு, பொட்டுக்கடலை மாவு, 1 டீஸ்பூன் எள், சிறிதளவு பெருங்காயம், தேவையான அளவு உப்பு மற்றும் காரத்திற்கு ஏற்ப வரமிளகாய் சேர்த்து நன்கு கலந்து கொள்ளவும்.

அடுத்து, 1 டேபிள்ஸ்பூன் எண்ணெயை சூடுபடுத்தி, அதை மாவுடன் சேர்த்து கைப்பிடியாக மாவை பிசையவும். இது முறுக்கு இன்னும் மென்மையாக இருக்க உதவும். பின்னர், வெதுவெதுப்பான தண்ணீரை கொஞ்சம் கொஞ்சமாக சேர்த்து, மாவை சப்பாத்தி மாவை விட சற்று தளர்வாகப் பிசைந்துகொள்ளவும். மாவு கைகளில் ஒட்டாமல் இருக்க, சிறிது எண்ணெய் தடவிக் கொள்ளலாம்.

பிசைந்த மாவை, முறுக்கு அச்சுக்கு மாற்றவும். ஸ்டார் அச்சு அல்லது உங்களுக்கு விருப்பமான அச்சைப் பயன்படுத்தலாம். ஒரு கடாயில் எண்ணெய் ஊற்றி நன்கு சூடுபடுத்தவும். எண்ணெய் சூடானதும், மிதமான தீயில் மாவை முறுக்குகளாக பிழிந்து, பொன்னிறமாக வறுத்து எடுக்கவும். முறுக்குகள் நன்கு மொறுமொறுப்பாக மாறும் வரை வறுக்க வேண்டும்.

View this post on Instagram

A post shared by Ajitha Raja (@mayaskitchentamil)

சுவையான இன்ஸ்டன்ட் முறுக்கு தயார். இதனை காற்று புகாத டப்பாவில் சேமித்து, நீண்ட நாட்கள் பயன்படுத்தலாம். இந்த எளிமையான செய்முறையைப் பின்பற்றி, வீட்டிலேயே சுவையான முறுக்கை செய்து மகிழலாம்.