பீட்ரூட் ரைஸ்... செம்ம ஹெல்தி லஞ்ச்; இப்படி செய்து குடுங்க!

பள்ளி செல்லும் குழந்தைகளுக்கு ஏற்ற ஒரு சத்தான மற்றும் சுவையான பீட்ரூட் சாதம் செய்வது எப்படி என்று மாம் ஆஃப் பாய்ஸ் இன்ஸ்டா பக்கத்தில் கூறியிருப்பது பற்றி பார்ப்போம். இதனை எளிதில் செய்துவிடலாம். பீட்ரூட்டில் அதிக நார்ச்சத்து இருப்பதால், செரிமான மண்டலத்தை ஆரோக்கியமாக வைத்திருக்க உதவுகிறது. இது குடல் இயக்கங்களை சீராக்கி, மலச்சிக்கலைத் தடுக்கிறது. எனவே பிள்ளைகளுக்கு வாரத்தில் ஒருமுறையாவது இதை செய்து கொடுங்கள்.

தேவையான பொருட்கள்:

கடுகு
கடலை பருப்பு
கறிவேப்பிலை
பச்சை மிளகாய்
வெங்காயம்
பீட்ரூட் 
முட்டை  அல்லது பன்னீர்
உப்பு
மஞ்சள் தூள்
கரம் மசாலா
மிளகு தூள்
சீரக தூள்
சமைத்த சாதம்
எண்ணெய்

செய்முறை:

முதலில், ஒரு கடாயில் சிறிதளவு எண்ணெய் ஊற்றி சூடாக்கவும். எண்ணெய் சூடானதும், கடுகு, கடலை பருப்பு சேர்த்துப் பொரிய விடவும். பின்னர் கறிவேப்பிலை, பச்சை மிளகாய், மற்றும் நறுக்கிய வெங்காயம் சேர்த்து நன்கு வதக்கவும். வெங்காயம் பொன்னிறமாக வதங்கியதும், துருவிய பீட்ரூட்டைச் சேர்த்து, அதன் பச்சை வாசனை முற்றிலுமாகப் போகும் வரை நன்கு வதக்கவும்.

பீட்ரூட் நன்கு வதங்கிய பிறகு, இரண்டு முட்டைகளை உடைத்து ஊற்றி, பீட்ரூட்டுடன் கலந்து வதக்கவும். முட்டையை நன்றாக வதக்கி, கலவை உதிரியாக ஆகும் வரை கிளறவும். சைவ உணவு உண்பவர்கள் முட்டைக்குப் பதிலாக உதிர்த்த பன்னீரைப் பயன்படுத்தலாம். அடுத்து, உப்பு, மஞ்சள் தூள், கரம் மசாலா, மிளகு தூள், மற்றும் சீரக தூள் சேர்த்து, அனைத்து மசாலாப் பொருட்களும் கலவையுடன் நன்கு கலக்கும் வரை கிளறவும். இந்த மசாலா கலவை உதிரியாக ஆகும் வரை குறைந்த தீயில் வதக்கவும்.

View this post on Instagram

A post shared by Vaishalibalachandar (@mom_of_boysvaishu)

இப்போது, ஏற்கனவே சமைத்து வைத்துள்ள சாதத்தை இந்தக் கலவையில் சேர்த்து, அனைத்தும் ஒன்றாகக் கலக்கும் வரை நன்கு கிளறவும். சாதத்தின் ஒவ்வொரு பகுதியிலும் பீட்ரூட் மற்றும் மசாலா கலவை சேர்ந்திருக்க வேண்டும். இப்போது, சுவையான மற்றும் சத்தான பீட்ரூட் சாதம் தயார். இதை உங்கள் குழந்தைகளின் மதிய உணவுப் பெட்டியில் வைத்து அனுப்பலாம். இந்த எளிய செய்முறை மூலம், ஆரோக்கியமான உணவை விரைவாகவும் சுலபமாகவும் செய்து அசத்தலாம்.