தங்க நிறத்தில் டேஸ்டி சோறு... சளி, இருமலுக்கு அம்புட்டு நல்லது!

சளி மற்றும் இருமல் தொந்தரவால் அவதிப்படுபவர்களுக்கு இந்த சுவையான தங்கச் சோறு ஒரு சிறந்த மருந்தாக அமைகிறது. இது பார்ப்பதற்கு மட்டுமல்லாமல், சாப்பிடுவதற்கும் அருமையாக இருக்கும். கீழக்கரை பகுதியில் மிகவும் பிரசித்தி பெற்ற இந்த தங்கச் சோறு, சளி மற்றும் இருமல் பிரச்சனைகளுக்கு ஒரு அருமையான தீர்வாக இருக்கும். இந்த சுவையான மற்றும் ஆரோக்கியமான சாதத்தை எப்படி செய்வது என்று ஆர்.கே.ரெசிபி பவுல் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

எண்ணெய்
பட்டை, கிராம்பு போன்ற மசாலா பொருட்கள்
நீளமாக நறுக்கிய வெங்காயம் - 2
கறிவேப்பிலை - 2 கொத்து
பச்சை மிளகாய் - 3
இஞ்சி பூண்டு விழுது - 1.5 தேக்கரண்டி
மஞ்சள் தூள் - 1 தேக்கரண்டி
உப்பு
தேங்காய்ப்பால் - 1 கப்
தண்ணீர் - 1 கப்
வறுத்து அரைத்த சோம்பு தூள் - 1 தேக்கரண்டி
சாதம்

செய்முறை:

ஒரு பிரஷர் குக்கரில் இரண்டு தேக்கரண்டி எண்ணெய் விட்டு, காய்ந்ததும் மசாலா பொருட்களை சேர்த்து வதக்கவும். பிறகு நீளமாக நறுக்கிய வெங்காயம், கறிவேப்பிலை, பச்சை மிளகாய் சேர்த்து நன்கு வதக்கவும். அதன் பிறகு இஞ்சி பூண்டு விழுது, மஞ்சள் தூள் மற்றும் தேவையான அளவு உப்பு சேர்த்து வதக்கவும்.

தேங்காய்ப்பால் மற்றும் தண்ணீர் சேர்த்து, வறுத்து அரைத்த சோம்பு தூள் சேர்த்து நன்கு கொதிக்க விடவும். அதன் பிறகு சாதத்தை சேர்த்து நன்கு கிளறி, பிரஷர் குக்கரில் வைத்து வேகவைத்தால் சுவையான தங்கச் சோறு தயார். இந்த தங்கச் சோற்றுடன் கறி, சிக்கன் கிரேவி, சோயா சங்க்ஸ் கிரேவி, துவையல் அல்லது கருவாட்டு குழம்பு சேர்த்து சாப்பிடலாம்.

சளி மற்றும் இருமல் போன்ற உடல்நலக் கோளாறுகள் ஏற்படும்போது, உணவுப் பழக்கவழக்கங்களில் கவனம் செலுத்துவது மிகவும் அவசியம். அத்தகைய சமயங்களில், ஆரோக்கியமான மற்றும் எளிதில் செரிமானம் ஆகக்கூடிய உணவுகளைத் தேர்ந்தெடுப்பது, விரைவான குணமடைதலுக்கு உதவும். இந்த சோறுக்கு தங்க நிறத்தைக் கொடுப்பது மஞ்சள் தூள். மஞ்சள், இயற்கையாகவே ஒரு சிறந்த நோய் எதிர்ப்பு சக்தியாகவும், கிருமி நாசினியாகவும் செயல்படுகிறது. இஞ்சி மற்றும் பூண்டு விழுது, உடலுக்கு நோய் எதிர்ப்பு சக்தியை அதிகரிப்பதுடன், சளி மற்றும் இருமல் காரணமாக ஏற்படும் அடைப்புகளை நீக்குகிறது.