ஹோட்டல் ஸ்டைலில் ஒரு ஸ்வீட்... வெறும் 10 நிமிடம் போதும்!

அவல், பால் மற்றும் நெய்யின் கலவையில் உருவாகும் இந்த அவல் கேசரி, விருந்து சமயங்களில் அல்லது திடீர் விருந்தாளிகள் வரும்போது மிகச் சிறந்த இனிப்பு வகையாகும். இதை வீட்டிலேயே எளிதாகவும் விரைவாகவும் எப்படி செய்யலாம் என்று ரேகாஸ்குசினா யூடியூப் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்

அவல்
தண்ணீர்
பால்
குங்குமப்பூ
சர்க்கரை
நெய்
ஏலக்காய் பொடி
உப்பு
பிஸ்தா
முந்திரி
திராட்சை

செய்முறை:

முதலில், அடுப்பில் ஒரு வாணலியை வைத்து, அதில் ஒரு டேபிள்ஸ்பூன் நெய் ஊற்றவும். நெய் சூடானதும், அதில் அவலை சேர்த்து, பொன்னிறமாகவும் மொறுமொறுப்பாகவும் மாறும் வரை நன்கு வறுக்கவும். வறுத்த அவலை ஆறவிட்டு, மிக்ஸியில் போட்டு கொரகொரப்பான ரவை பதத்திற்கு அரைத்து எடுத்துக்கொள்ளவும்.

அதே வாணலியில், தண்ணீர் மற்றும் பால் இரண்டையும் சேர்த்து கொதிக்க விடவும். தண்ணீர் கொதிக்கும்போது, அதில் சிறிதளவு குங்குமப்பூவை சேர்த்து கலக்கவும். இப்போது, அரைத்து வைத்த அவல் ரவையை கொஞ்சம் கொஞ்சமாக சேர்த்து, கட்டி பிடிக்காமல் இருக்க தொடர்ந்து கிளறவும்.

அவல் கலவை கெட்டியாகத் தொடங்கியதும், அதில் சர்க்கரையை சேர்க்கவும். சர்க்கரை கரைந்து, கலவை மீண்டும் இளகிய பதம் அடையும். கலவை மீண்டும் கெட்டியான பிறகு, மீதமுள்ள இரண்டு டேபிள்ஸ்பூன் நெய்யை சேர்த்து நன்றாகக் கிளறவும். பிறகு, ஏலக்காய் பொடி மற்றும் ஒரு சிட்டிகை உப்பு சேர்த்து நன்கு கலக்கவும்.

அதே நேரத்தில், மற்றொரு சிறிய வாணலியில் சிறிதளவு நெய் ஊற்றி, முந்திரி மற்றும் திராட்சையை வறுத்து எடுத்து, அவற்றை கேசரியில் சேர்க்கவும். இறுதியாக, பொடியாக நறுக்கிய பிஸ்தாவை சேர்த்து கலக்கி, அடுப்பை அணைக்கவும். இப்போது உங்கள் சுவையான அவல் கேசரி பரிமாறுவதற்குத் தயாராக உள்ளது. இதை சூடாகப் பரிமாறலாம்.

இந்த அவல் கேசரி ஹோட்டல் ஸ்டைலில் பந்தியில் வைக்க கூடிய சுவையில் இருக்கும். இதனை வெறும் 10 நிமிடத்தில் செய்து விடலாம். இதில் குழந்தைகளுக்கு பிடித்த வேறு நிறம் கூட சேர்த்து செய்யலாம். ஆறவைத்து நறுக்கி துண்டுகளாக கூட கொடுக்கலாம்.