மலச்சிக்கல் பிரச்சனை இருக்கா? அப்போ இந்த சட்னியை அதிகம் சேர்த்துக்கோங்க

கொத்தமல்லி சட்னி என்பது தென்னிந்திய சமையலில் மிகவும் பிரபலமான ஒரு உணவு. இட்லி, தோசை, வடை போன்ற உணவுகளுக்கு சிறந்த துணையாக இருப்பதுடன், சூடான சாதத்துடனும் சேர்த்து சாப்பிட அருமையாக இருக்கும். சுவை மட்டுமல்ல, கொத்தமல்லியில் உள்ள ஆரோக்கிய நன்மைகளும் இதை ஒரு சிறந்த உணவாக மாற்றுகிறது. இந்த சட்னியை எப்படி செய்வது பார்ப்போம்.

தேவையான பொருட்கள்:

கொத்தமல்லி - 1 கட்டு  
தேங்காய் துருவல் - ½ கப்
பொட்டுக்கடலை - 2 டேபிள் ஸ்பூன்
பச்சை மிளகாய் - 2 முதல் 3 
சின்ன வெங்காயம் - 4
பூண்டு - 2 பல்
இஞ்சி 
புளி
உப்பு 
தண்ணீர் 
நல்லெண்ணெய் - 1 டேபிள் ஸ்பூன்
கடுகு - ½ டீஸ்பூன்
உளுத்தம் பருப்பு - ½ டீஸ்பூன்
கறிவேப்பிலை - சிறிதளவு
பெருங்காயம் - ஒரு சிட்டிகை

செய்முறை:

ஒரு கடாயில் எண்ணெய் ஊற்றி, சூடானதும் பச்சை மிளகாய், வெங்காயம், பூண்டு மற்றும் இஞ்சி சேர்த்து வதக்கவும். வெங்காயம் பொன்னிறமாக வதங்கியதும், சுத்தம் செய்த கொத்தமல்லி தழையை சேர்த்து நன்கு வதக்கவும். கொத்தமல்லியின் நிறம் மாறாமல் வதக்குவது அவசியம்.

கொத்தமல்லி வதங்கியதும் அடுப்பை அணைத்து ஆறவிடவும். ஆறியதும், வதக்கிய கொத்தமல்லி கலவையை ஒரு மிக்ஸி ஜாரில் சேர்க்கவும். அதனுடன் தேங்காய் துருவல், பொட்டுக்கடலை, புளி மற்றும் தேவையான அளவு உப்பு சேர்த்துக்கொள்ளவும். சிறிது தண்ணீர் சேர்த்து மையாக அரைக்கவும். சட்னியை கெட்டியாக விரும்பினால் குறைவான தண்ணீர் பயன்படுத்தவும்.

இப்போது, ஒரு சிறிய கடாயில் தாளிக்க தேவையான பொருட்களை சேர்த்து தாளித்து, அரைத்து வைத்த சட்னியில் கொட்டவும். சுவையான மற்றும் ஆரோக்கியமான கொத்தமல்லி சட்னி தயார். கொத்தமல்லியில் உள்ள நார்ச்சத்து செரிமான அமைப்பை சீராக இயங்க உதவுகிறது. மலச்சிக்கல் போன்ற பிரச்சனைகளுக்கு இது ஒரு நல்ல தீர்வாக அமையும். இதை சர்க்கரை நோயாளிகளும் எடுத்துக்கொள்ளலாம். கொத்தமல்லி, இரத்தத்தில் உள்ள சர்க்கரையின் அளவை கட்டுப்படுத்த உதவுகிறது. நீரிழிவு நோயாளிகளுக்கு இது ஒரு சிறந்த உணவு.