வெண்டை வறுவலுக்கு சீக்ரெட் மசாலா... இனி மிச்சம் வைக்காம சாப்பிடுவாங்க!

வீட்டில் உள்ளவர்களுக்கு வெண்டைக்காய் வறுவல் என்றாலே முகத்தைச் சுளித்துக் கொள்கிறார்களா? வெண்டைக்காயில் உள்ள பிசுபிசுப்புத் தன்மை காரணமாக பலர் அதை சமைப்பதையும், சாப்பிடுவதையும் தவிர்த்து விடுகின்றனர். ஆனால், இந்த சிறப்பு மசாலாவுடன் வெண்டைக்காய் வறுவலை செய்து பாருங்கள். இதன் சுவை, மணம் மற்றும் மொறுமொறுப்புத் தன்மை அனைவரையும் ஈர்க்கும். இந்த எளிமையான செய்முறை, சமையல் அறியாதவர்களுக்கும் மிகவும் உதவியாக இருக்கும். இதனை எப்படி செய்வது என்று மைசெல்ஃப்டைம் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

வெண்டைக்காய் - 250 கிராம்
வறுத்த வேர்க்கடலை - 1 டேபிள்ஸ்பூன்
காஷ்மீரி மிளகாய் தூள் - 1 டேபிள்ஸ்பூன்
தனியா தூள் - 1 டேபிள்ஸ்பூன்
மஞ்சள் தூள் - ¼ டேபிள்ஸ்பூன்
சீரகத் தூள் - ¼ டேபிள்ஸ்பூன்
உப்பு - 1 டேபிள்ஸ்பூன்
பூண்டு - 3 பல்
எண்ணெய் - தேவையான அளவு

செய்முறை:

முதலில், வெண்டைக்காயை நன்கு கழுவி, ஒரு சுத்தமான துணியால் துடைத்து, பின்னர் சம அளவு துண்டுகளாக நறுக்கி வைத்துக் கொள்ளவும். வெண்டைக்காயில் ஈரப்பதம் இல்லாதவாறு பார்த்துக் கொள்வது முக்கியம். ஒரு மிக்ஸி ஜாரில் வறுத்த வேர்க்கடலை, காஷ்மீரி மிளகாய் தூள், தனியா தூள், மஞ்சள் தூள், சீரகத் தூள், உப்பு மற்றும் பூண்டு ஆகியவற்றைச் சேர்த்து, தேவையானால் சிறிதளவு தண்ணீர் சேர்த்து அரைத்துக் கொள்ளவும். இந்த மசாலா பேஸ்ட் தான் இந்த ரெசிபியின் சுவைக்கு அடிப்படை.

அடுத்து, ஒரு வாணலியில் எண்ணெய் ஊற்றி, நறுக்கிய வெண்டைக்காயை சேர்த்து, அது பாதி அளவுக்கு வறுபடும் வரை வதக்கவும். வறுத்த வெண்டைக்காயை எண்ணெய் வடியும்படி எடுத்து தனியே வைத்துக் கொள்ளவும். அதே வாணலியில் இருக்கும் அதிகப்படியான எண்ணெயை நீக்கி, சிறிதளவு மட்டும் வைத்துக் கொள்ளவும். அதில் அரைத்து வைத்துள்ள மசாலா பேஸ்ட்டை சேர்த்து, அரை நிமிடம் வரை வதக்கவும். மசாலாவின் பச்சை வாசனை போக வதக்குவது அவசியம்.

View this post on Instagram

A post shared by Kuralarasi/swetha (@myselftime_87)

இப்போது, வறுத்து வைத்துள்ள வெண்டைக்காயை மசாலாவுடன் சேர்த்து, நன்றாக கிளறி விடவும். மசாலா வெண்டைக்காயின் அனைத்துப் பகுதிகளிலும் பரவும்படி பார்த்துக் கொள்ளவும். கடைசியாக, அடுப்பை குறைந்த தீயில் வைத்து, இந்த கலவையை 6 முதல் 7 நிமிடங்கள் வரை வறுக்கவும். வெண்டைக்காய் மொறுமொறுப்பாக மாறும் வரை வறுக்கலாம். இந்த சுவையான, காரமான வெண்டைக்காய் வறுவல் சூடான சாதம், சாம்பார் மற்றும் ரசத்துடன் சேர்த்து சாப்பிட அருமையாக இருக்கும். உங்கள் வீட்டில் உள்ளவர்கள் இனி அடம் பிடிக்காமல், விரும்பி சாப்பிடுவார்கள்.