உறவினர்களை வரவேற்க இந்த ஒரு பாயாசம்போதும் - இந்த பழங்களை மறக்காம சேருங்கள்

முக்கனி பாயசம் என்பது மாம்பழம், பலாப்பழம் மற்றும் வாழைப்பழம் ஆகிய மூன்று பழங்களைக் கொண்டு செய்யப்படும் ஒரு பாரம்பரிய தென்னிந்திய இனிப்பு வகை ஆகும். குறிப்பாக தமிழ் புத்தாண்டு போன்ற விசேஷ நாட்களில் இது செய்யப்படுகிறது. இதன் சுவை தனித்துவமானது. இதனை எப்படி செய்வது என்று சக்கரசாதமும் வடகறியும் யூடியூப் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

மாம்பழம் (நறுக்கியது) - 1
பலாப்பழம் (நறுக்கியது) - 1/2 கப்
வாழைப்பழம் (நறுக்கியது) - 1
தேங்காய்ப் பால் (திக்) - 1 கப்
வெல்லம் - 1/2 கப்
ஏலக்காய் பொடி - 1/4 தேக்கரண்டி
நெய் - 1 தேக்கரண்டி
முந்திரி - 5-6
காய்ந்த திராட்சை - 5-6

செய்முறை:

முதலில், வெல்லத்தை சிறிது தண்ணீரில் கரைத்து, பின் வடிகட்டி சுத்தமான பாகாக எடுத்து கொள்ள வேண்டும். இது பாயசத்தில் வெல்லத்திலுள்ள தூசுகள் சேர்வதைத் தவிர்க்க உதவும். அடுத்து, ஒரு கடாயில் நெய் விட்டு, முந்திரி மற்றும் திராட்சையை பொன்னிறமாக வறுத்து எடுத்து வைத்துக் கொள்ள வேண்டும். அதே கடாயில், நறுக்கிய மாம்பழம், பலாப்பழம், மற்றும் வாழைப்பழத்தை சேர்த்து, பழங்களின் மணம் வரும் வரை லேசாக வதக்க வேண்டும்.

பழங்கள் வதங்கிய பிறகு, தயாரித்து வைத்துள்ள வெல்லப் பாகை அதில் ஊற்றி, பழங்களுடன் நன்கு கலக்க வேண்டும். இந்த கலவை சிறிது கொதி வந்ததும், தேங்காய்ப் பாலை சேர்க்க வேண்டும். தேங்காய்ப் பால் சேர்த்த பிறகு, பாயசத்தை அதிக நேரம் கொதிக்க விடக்கூடாது. குறைந்த தீயில் இரண்டு நிமிடங்கள் கொதிக்க விட்டால் போதும்.

கடைசியாக, ஏலக்காய் பொடி மற்றும் வறுத்த முந்திரி, திராட்சை சேர்த்து கலக்க வேண்டும். இத்துடன், ஆரோக்கியம் நிறைந்த மற்றும் சுவையான முக்கனி பாயசம் தயார். இந்த பாயசத்தை சூடாகவும், குளிர்ச்சியாகவும் பரிமாறலாம். இதனை உடனே சாப்பிட்டால் சுவை நன்றாக இருக்கும். சில்லுன்னு வேண்டும் என்றால் ஐஸ்கட்டி போட்டு குடிக்கலாம்.