சட்டுன்னு ஒரு ஸ்வீட் ரெசிபி... இந்த ஒரு பொருள் போதும்!

அதிரசமா? அல்வா வா? போண்டா வா? எந்த பண்டிகை என்றாலும் இந்த இனிப்புகள் நம் நினைவுக்கு வரும். ஆனால், அவல் லட்டுவை பற்றி கேள்விப்பட்டிருக்கிறீர்களா? கேட்டால் ஆச்சரியப்பட வைக்கும். இது மிகவும் பாரம்பரியமான இனிப்பு பண்டமாகும். இந்த இனிப்பை மிக விரைவாகவும், அதே நேரத்தில் மிகவும் சுவையாகவும் தயாரிக்க முடியும். இதோ இந்த அவல் லட்டுவை தயாரிப்பது எப்படி என்று ஹோம்குக்கிங்தமிழ் யூடியூப் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

வேர்க்கடலை - 1/4 கப்
பொட்டுக்கடலை - 1/4 கப்
அவல் (தடித்த அவல்) - 1 கப்
நெய் - 2 தேக்கரண்டி
முந்திரி, திராட்சை - தேவையான அளவு
தண்ணீர் - 3/4 கப்
வெல்லம் - 3/4 கப்
துருவிய தேங்காய் - 1/2 கப்
ஏலக்காய் தூள் - 1 தேக்கரண்டி

செய்முறை:

ஒரு வாணலியில், 1/4 கப் வேர்க்கடலையை குறைந்த தீயில் 2 நிமிடங்கள் வறுக்க வேண்டும். பிறகு, 1/4 கப் பொட்டுக்கடலையை சேர்த்து லேசாக வறுக்கவும். பின்னர் 1 கப் தடித்த அவலை சேர்த்து, தீயை மிதமாக வைத்து 2 நிமிடங்கள் வறுக்கவும். வறுத்த கலவையை ஒரு தட்டில் மாற்றி ஆறவிட வேண்டும்.

இன்னொரு வாணலியில், நெய் விட்டு முந்திரியை பொன்னிறமாக வறுக்கவும். திராட்சையை சேர்த்து உப்பி வரும் வரை வறுத்து, ஒரு கிண்ணத்தில் எடுத்து தனியாக வைக்க வேண்டும். அடுத்து, வெல்லப்பாகு தயாரிக்க, 3/4 கப் வெல்லத்தூள் மற்றும் 3/4 கப் தண்ணீரை ஒரு பாத்திரத்தில் சேர்த்து வெல்லம் கரையும் வரை சூடாக்க வேண்டும். இந்த பாகை வடிகட்டி, அதில் உள்ள தூசிகளை நீக்கி தனியாக வைக்க வேண்டும்.

ஆறவைத்த அவல், வேர்க்கடலை மற்றும் பொட்டுக்கடலை கலவையை மிக்சியில் போட்டு, ரவை போன்ற கொரகொரப்பான பதத்திற்கு அரைத்து ஒரு கிண்ணத்தில் எடுத்துக்கொள்ள வேண்டும். இப்போது, வெல்லப்பாகு, 1/2 கப் துருவிய தேங்காய், அரைத்த பொடி, 1 தேக்கரண்டி ஏலக்காய் தூள், வறுத்த முந்திரி, திராட்சை, மற்றும் 2 தேக்கரண்டி நெய்யை ஒரு வாணலியில் சேர்த்து கெட்டியாகும் வரை கிளற வேண்டும்.

கலவை சிறிது ஆறியதும், உள்ளங்கைகளில் சிறிது நெய் தடவி, சிறிய உருண்டைகளாக பிடித்து லட்டுக்களை தயார் செய்யலாம். இந்த அவல் லட்டுக்களை சுவைத்து மகிழலாம். இந்த இனிப்பு பண்டம் குழந்தைகள் முதல் பெரியவர்கள் வரை அனைவருக்கும் பிடித்தமான ஒன்றாக இருக்கும்.