குழம்பு செய்ய குழப்பம் வேணாம்... இந்த 2 பொருள் வச்சு இப்படி செய்யுங்க!

சாதத்திற்கு தொட்டுக்கொள்ள எப்போதும் ஒரே வகை சட்னி, சாம்பார் என்று சலித்துவிட்டதா? இதோ உங்களுக்காக, சுவையும் ஆரோக்கியமும் நிறைந்த வெங்காயம் கறிவேப்பிலை துவையல். இதில் கறிவேப்பிலையின் நறுமணமும், சின்ன வெங்காயத்தின் இனிப்பும் சேர்ந்து ஒரு புதுவிதமான அனுபவத்தை கொடுக்கும். குறிப்பாக, இந்த துவையல் சூடான சாதத்துடன் பிசைந்து சாப்பிட அவ்வளவு அருமையாக இருக்கும். இட்லி, தோசை, சப்பாத்தி என பல உணவுகளுக்கும் இது ஒரு சிறந்த துணை உணவு. இதனை எப்படி சட்டுன்னு செய்யலாம் என்று காயுஸ் கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

நல்லெண்ணெய் - 2 தேக்கரண்டி
பூண்டு - 6 முதல் 8 பல்
சீரகம் - 1 தேக்கரண்டி
புளி - சிறிய நெல்லிக்காய் அளவு
சின்ன வெங்காயம் - 2 கைப்பிடி அல்லது பெரிய வெங்காயம் - 2
மஞ்சள் தூள் - 1/2 தேக்கரண்டி
மிளகாய் தூள் - 1 முதல் 1.5 தேக்கரண்டி 
புதிய கறிவேப்பிலை - 2 கைப்பிடி
உப்பு - தேவைக்கேற்ப

செய்முறை:

முதலில் ஒரு மண் சட்டியில் (அடுப்பில் வாணலி அல்லது கடாய் பயன்படுத்தலாம்) நல்லெண்ணெய் ஊற்றி சூடாக்கவும். எண்ணெய் காய்ந்ததும், பூண்டு, சீரகம், புளி மற்றும் சின்ன வெங்காயம் சேர்த்து வதக்கவும். வெங்காயம் கண்ணாடி போல் நிறம் மாறும் வரை வதக்கினால் போதும்.

இப்போது, மஞ்சள் தூள், மிளகாய் தூள், கறிவேப்பிலை மற்றும் தேவையான அளவு உப்பு சேர்த்து நன்கு வதக்கவும். கறிவேப்பிலையின் நிறம் மாறாமல், அதன் பச்சை வாசனை போகும் வரை லேசாக வதக்கினால் போதும். எல்லாம் நன்கு வதங்கியதும், அடுப்பை அணைத்துவிட்டு, கலவையை ஆறவிடவும்.

View this post on Instagram

A post shared by Kayus Kitchen (@kayus_kitchen)

ஆறிய இந்த கலவையை மிக்ஸி ஜாரில் சேர்த்து, தண்ணீர் சேர்க்காமல், கொரகொரப்பாக அரைத்துக் கொள்ளவும். இதுவே நம் துவையலின் சரியான பதம். அரைத்த துவையலை ஒரு கிண்ணத்தில் மாற்றி, சுடச்சுட சாதத்துடன் சிறிது நல்லெண்ணெய் சேர்த்து பிசைந்து சாப்பிட்டால், அதன் சுவை அலாதியானது. இந்த துவையல் செய்வது மிகவும் எளிது, ஆனால் அதன் சுவை அபாரமானது. இதை நீங்கள் ஒரு முறை செய்து பார்த்தால், மீண்டும் மீண்டும் செய்யத் தூண்டும். உடலுக்கு ஆரோக்கியமும், சுவைக்கு விருந்தும் கொடுக்கும் இந்த துவையலை இப்போதே செய்து பாருங்கள்.