வெறும் 2 பயறு போதும்... புசு புசு இட்லி செம்ம சட்னி!

இட்லி, தோசை, ஊத்தப்பம் போன்ற காலை உணவுகளுக்கு சைட் டிஷ்ஷாக தேங்காய் சட்னி அல்லது தக்காளி சட்னி மட்டுமே செய்து சலித்துவிட்டதா? இதோ உங்களுக்காக ஒரு புதிய மற்றும் சுவையான சட்னி ரெசிபி எப்படி செய்வது என்று காயுஸ் கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம். பருப்பு சட்னிகளின் வகைகளில் மிகவும் பிரசித்தி பெற்றது துவரம்பருப்பு சட்னி. இதில் புரதச்சத்து அதிகம் இருப்பதால் ஆரோக்கியமானதாகவும், அதே நேரத்தில் இதன் தனித்துவமான சுவை மூலம் அனைவரையும் கவரும். இந்த ரெசிபியை முயற்சி செய்து, உங்கள் குடும்பத்தினரை அசத்துங்கள்.

தேவையான பொருட்கள்:

நல்லெண்ணெய்: 2 தேக்கரண்டி
பச்சை வேர்க்கடலை: 2 மேஜைக்கரண்டி
துவரம்பருப்பு: 3 மேஜைக்கரண்டி
கறிவேப்பிலை: சிறிதளவு
நெல்லிக்காய் அளவு புளி
பச்சை மிளகாய்: 4-5
பெரிய வெங்காயம்: 1
உப்பு: தேவையான அளவு
கடலை எண்ணெய்: 2 தேக்கரண்டி
கடுகு: 1 தேக்கரண்டி
காய்ந்த மிளகாய்: 2-3
பெருங்காயம்: 1/2 தேக்கரண்டி
கறிவேப்பிலை: சிறிதளவு

செய்முறை:

ஒரு கடாயில் நல்லெண்ணெய் ஊற்றி சூடானதும், அதில் வேர்க்கடலை மற்றும் துவரம்பருப்பை சேர்த்து பொன்னிறமாக வறுக்கவும். பருப்பு வறுபட்டதும், கறிவேப்பிலை, புளி, பச்சை மிளகாய், வெங்காயம், மற்றும் தேவையான அளவு உப்பு சேர்த்து 3 நிமிடங்கள் வதக்கவும். அனைத்து பொருட்களும் வதங்கிய பிறகு, அடுப்பை அணைத்து, கலவையை ஆறவிடவும். ஆறிய கலவையை ஒரு மிக்ஸி ஜாரில் மாற்றி, சிறிது தண்ணீர் சேர்த்து, நன்கு மையாக அரைக்கவும்.

View this post on Instagram

A post shared by Kayus Kitchen (@kayus_kitchen)

அரைத்த சட்னியை ஒரு பாத்திரத்திற்கு மாற்றவும். அடுத்து, தாளிப்பு தயார் செய்ய ஒரு சிறிய வாணலியில் கடலை எண்ணெய் ஊற்றி, கடுகு சேர்க்கவும். கடுகு வெடித்ததும், காய்ந்த மிளகாய், பெருங்காயம் மற்றும் கறிவேப்பிலை சேர்த்து தாளிக்கவும். இந்த தாளிப்பை சட்னியுடன் சேர்த்து நன்கு கலக்கவும். சுவையான மற்றும் ஆரோக்கியமான துவரம்பருப்பு சட்னி இப்போது தயார். இதை இட்லி மற்றும் தோசையுடன் பரிமாறி மகிழுங்கள். இந்த சட்னி மற்ற சட்னிகளை விட தனித்துவமான சுவையை அளிக்கும் என்பதில் சந்தேகமில்லை.