மலச் சிக்கல் டூ வெயிட் லாஸ்... நீர்ச்சத்து நிறைந்த இந்தக் காயில் சட்னி; இட்லி, தோசைக்கு தரமான காம்பினேஷன்!

நீர்ச்சத்து நிறைந்த ஒரு காயில் இதுவரை யாரும் செய்யாத சுவையில் ஒரு சட்னி. அது சுரைக்காய் சட்னி தான். சுரைக்காய் என்பது அதிக நீர்ச்சத்து கொண்ட, கோடை காலத்தில் விளையக் கூடிய காய் வகை ஆகும். சுரைக்காயில் சுமார் 96 சதவீதம் நீர்ச்சத்து நிரம்பியுள்ளது. இதனால், நம் உடலை குளிர்ச்சியாக வைத்துக் கொள்ளவும், போதுமான நீர்ச்சத்து வழங்கி புத்துணர்ச்சியாக வைத்துக் கொள்ளவும் இது உதவிகரமாக இருக்கிறது.

சட்னி என்றாலே பலரும் வெங்காயம், தக்காளி, தேங்காய் சேர்த்து செய்வதைத்தான் நினைப்பார்கள். ஆனால், இந்த சிறப்புச் சுரைக்காய் சட்னி மேற்கூறிய பொருட்கள் எதுவுமின்றி, சுரைக்காயை மட்டுமே கொண்டு தயாரிக்கப்படுகிறது.

இதன் அசத்தலான சுவை சூடான இட்லி மற்றும் தோசைக்கு இது அருமையான காம்பினேஷன். அது மட்டும் இல்லாமல் மலச்சிக்கல் பிரச்சனைக்கும் இது சரியான தீர்வாக அமையும். இதனை எப்படி செய்வது என்று ஃபூடிஸ்ரூஃப் இன்ஸ்டா பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

சுரைக்காய் - 1 கப்  
நல்லெண்ணெய் - 1 டீஸ்பூன் 
கடலைப்பருப்பு - 1 டீஸ்பூன்
உளுத்தம்பருப்பு - 1 டீஸ்பூன்
சீரகம் - 1/2 டீஸ்பூன்
பச்சை மிளகாய் - 4  
கறிவேப்பிலை  
கொத்தமல்லி இலை  
புளி  
கல் உப்பு - 1 டீஸ்பூன்  
பொட்டுக் கடலை  
எண்ணெய்
கடுகு
காய்ந்த மிளகாய்
கறிவேப்பிலை

செய்முறை:

ஒரு கடாயில் ஒரு டீஸ்பூன் எண்ணெய் விட்டு சூடாக்கவும். அதில் ஒரு டீஸ்பூன் கடலைப்பருப்பு, ஒரு டீஸ்பூன் உளுத்தம்பருப்பு, அரை டீஸ்பூன் சீரகம், மற்றும் நான்கு பச்சை மிளகாய் சேர்த்து பொன்னிறமாக வறுக்கவும்.
இத்துடன் ஒரு கப் தோல் நீக்கி நறுக்கிய சுரைக்காயைச் சேர்த்து, சுரைக்காய் நன்கு வெந்து மென்மையாகும் வரை வதக்கவும்.

மற்ற பொருட்களைச் சேர்த்தல்: சுரைக்காய் வெந்ததும், ஒரு டீஸ்பூன் கல் உப்பு, கொத்தமல்லி இலை, கறிவேப்பிலை, மற்றும் ஒரு சிறிய அளவிலான புளி சேர்த்து ஒரு நிமிடம் வதக்கி அடுப்பை அணைக்கவும்.

வதக்கிய கலவை ஆறியதும், மிக்ஸி ஜாரில் சேர்த்து, 1.5 டேபிள்ஸ்பூன் பொட்டுக் கடலையை சேர்த்து, தேவையான அளவு தண்ணீர் விட்டு சட்னி பதத்திற்கு அரைக்கவும். உங்களுக்கு விருப்பமான பதத்திற்கு நீர்க்க அல்லது கெட்டியாக அரைத்துக்கொள்ளலாம்.

இறுதியாக, ஒரு சிறிய கடாயில் எண்ணெய் விட்டு, கடுகு, காய்ந்த மிளகாய், மற்றும் கறிவேப்பிலை சேர்த்துத் தாளித்து, அரைத்த சட்னியுடன் சேர்க்கவும். இந்த சுவையான மற்றும் ஆரோக்கியமான சுரைக்காய் சட்னி சூடான இட்லி, தோசை போன்றவற்றுடன் பரிமாறத் தயார்.