மல்லிப் 'பூ' இட்லிக்கு மதுரை பேமஸ் சாம்பார்: செஃப் தீனா ரெசிபி

மதுரை ஸ்டைலில் வீட்டிலேயே இட்லி, தோசைகளுக்கு ஏற்ற மாதிரி எப்படி சாம்பார் செய்வது என்று செஃப் தீனா தனது யூடியூப் பக்கத்தில் செய்து காட்டியிருப்பது பற்றி பார்ப்போம். இந்த சாம்பார் எப்போதும்போல் இல்லாமல் சுவை நன்றாக இருக்கும். சாம்பாருக்காகவே இட்லி, தோசை அதிகம் கேட்டு வாங்கி சாப்பிடுவார்கள். அதிலும் இதில் காய்கள் மற்றும் கீரைகள் என அதிகம் சேர்க்கப்படுகிறது. இது பிள்ளைகளுக்கும் மிகவும் பிடிக்கும்.

தேவையான பொருட்கள்:

துவரம்பருப்பு 
சின்ன வெங்காயம் 
கேரட், பீன்ஸ், முருங்கைக்காய்
தக்காளி
மஞ்சள் தூள்
மிளகாய் தூள்
மல்லித்தூள்
வெல்லம்
வெந்தயம்
கடுகு & உளுத்தம் பருப்பு
கறிவேப்பிலை
பச்சை மிளகாய்
வரமிளகாய்
நெய்
பெருங்காயத்தூள்
கல்லுப்பு
நல்லெண்ணெய்

செய்முறை:

இந்த சாம்பாரை தயாரிக்க, முதலில் துவரம்பருப்பை மட்டும் எடுத்து, சிறிதளவு மஞ்சள் தூள் சேர்த்து மிக மென்மையாக வேகவைக்க வேண்டும். பருப்பை முழுவதுமாக மசித்து, தனியே வைக்கவும். பின்னர், நல்லெண்ணெய் ஊற்றி கடுகு, உளுத்தம் பருப்பு, வெந்தயம், கறிவேப்பிலை, வரமிளகாய் மற்றும் சின்ன வெங்காயம் சேர்த்து வதக்கவும்.

இதன் பிறகு, நறுக்கிய கேரட், பீன்ஸ், முருங்கைக்காய் சேர்த்து, அவை சிறிது வதங்கியதும் தக்காளியைச் சேர்க்கவும். காய்கறிகள் 40% வெந்ததும், மஞ்சள் தூள், மிளகாய் தூள், மல்லித்தூள் மற்றும் தேவையான உப்பில் பாதியைச் சேர்த்து நன்கு வதக்க வேண்டும்.

அடுத்து, வேகவைத்த பருப்புத் தண்ணீரை மட்டும் சேர்த்து, காய்கறிகள் முழுவதுமாக வேகும் வரை கொதிக்க விடவும். காய்கறிகள் வெந்தவுடன், மீதமுள்ள மசித்த பருப்பை சேர்த்து, நன்கு கலக்கவும். பருப்பை சேர்த்த பிறகு, சாம்பாரை அதிக நேரம் கொதிக்க வைக்கக் கூடாது என்பது முக்கியக் குறிப்பு. கடைசியாக, பெருங்காயத்தூள், மீதமுள்ள உப்பு, ஒரு சிறிய துண்டு வெல்லம் மற்றும் நறுக்கிய கொத்தமல்லி இலைகளைச் சேர்க்கவும்.

சாம்பார் பரிமாறுவதற்கு முன்பு, சிறிதளவு நெய் சேர்ப்பது அதன் சுவையை இன்னும் மேம்படுத்தும். இந்த சாம்பார், இட்லி, தோசை போன்ற காலை உணவு வகைகளுக்கு ஒரு சிறந்த துணையாக இருக்கும் என்பது குறிப்பிடத்தக்கது. இந்த எளிய, ஆனால் சுவையான செய்முறை, இனி உங்கள் வீட்டிலும் மதுரை திருமண சாம்பாரின் தனித்துவமான சுவையை அனுபவிக்க உதவும்.