மொறு மொறு வடை... உளுந்து ஊற வைக்க வேணாம்!

மாலை நேரத்தில் ஏதாவது ஸ்நாக்ஸ் சாப்பிட வேண்டும் என்று நினைப்பவர்களுக்கு, திடீரென்று வந்த விருந்தாளிகளை நன்கு கவனிக்க வேண்டும் என்று நினைப்பவர்களுக்கு ஒரு கப் அவல் இருந்தாலே போதும்.

அதை வைத்து மொறுமொறுப்பான வடையை சிம்பிளாக செய்யலாம். அதன் ரெசிபியை இதில் காண்போம். இதை கொஞ்ச நேரத்திலேயே ஈசியாக செய்து விடலாம். 

தேவையான பொருட்கள்:

அவல்,
தயிர்,
தண்ணீர்,
மைதா மாவு,
உப்பு,
சீரகம்,
கொத்தமல்லி,
கறிவேப்பிலை,
இஞ்சி,
வெங்காயம்,
பேக்கிங் சோடா மற்றும்
எண்ணெய்.

ஒரு கப் அவலை சுமார் மூன்று முறை நன்றாக கழுவி எடுத்துக் கொள்ள வேண்டும். இத்துடன் முக்கால் கப் தயிர் சேர்த்து நன்கு கலந்து, மிக்ஸியில் பசை பதத்திற்கு அரைக்க வேண்டும்.

இத்துடன் ஒரு கப் தண்ணீர், அதே கப் அளவிற்கு மைதா மாவு மற்றும் அரை டீஸ்பூன் உப்பு சேர்த்து கலக்கவும். இதையடுத்து, மீண்டும் அரை கப் அளவிற்கு மைதா மாவு சேர்த்து கைகளால் அழுத்தி பிசைய வேண்டும்.

இந்த மாவு 10 நிமிடங்களுக்கு ஊறிய பின்னர், ஒரு ஸ்பூன் சீரகம், சிறிது கொத்தமல்லி, கறிவேப்பிலை, துருவிய இஞ்சி, பொடியாக நறுக்கிய வெங்காயம் மற்றும் பச்சை மிளகாய் சேர்த்து கலக்க வேண்டும். 

இறுதியாக, அரை ஸ்பூன் பேக்கிங் சோடா கலந்து, கொஞ்ச, கொஞ்சமாக தட்டி ஓட்டை போட்டு எண்ணெய்யில் பொந்நிறமாக பொறித்து எடுத்தால், சுவையான அவல் வடை தயாராகி விடும். 

இது மொறுமொறுப்பாக இருப்பதால் குழந்தைகளுக்கு கூட பிடிக்கும். இது வெறும் அவல் தான் என்று யாராலும் கண்டுபிடிக்கவே முடியாது. 

அவலில் நார்ச்சத்து அதிகம் உள்ளது, இது செரிமான மண்டலத்தை சீராக இயங்க உதவுகிறது மற்றும் மலச்சிக்கல் போன்ற பிரச்சனைகளைத் தடுக்கிறது.

அவலில் வைட்டமின் பி உள்ளது, இது உடலின் ஆற்றல் உற்பத்திக்கு உதவுகிறது. எலும்புகள் மற்றும் பற்களின் ஆரோக்கியத்திற்கு கால்சியம் மிகவும் முக்கியமானது, அவலில் இதுவும் உள்ளது.

இரத்த சோகையைத் தடுக்க இரும்புச்சத்து அவசியமானது, அவலில் இதுவும் உள்ளது. இதில் உள்ள மாங்கனீசு உடலின் வளர்சிதை மாற்றத்திற்கு உதவுகிறது.

அதனால் இனிமே சட்டுனு ஒரு ஸ்னாக்ஸ் தயாரிப்பதற்கு கொஞ்சம் கூட யோசிக்காமல் ஒரு கப் அவல் எடுத்து வடை செய்து அசத்துங்க!