சாதம், இட்லிக்கு ஒரு அட்டகாசமான சைடிஷ்... லஞ்ச்க்கு கூட செம காம்பினேஷன்!

கீரை என்றாலே பலருக்கும் குழம்பு அல்லது பொரியல் தான் நினைவுக்கு வரும். ஆனால், ஆரோக்கியம் நிறைந்த கீரையை ஒரு வித்தியாசமான முறையில் தொக்காக செய்து பார்த்திருக்கிறீர்களா? இட்லி, தோசை, சாதம் என பல உணவுகளுக்கும் பக்க பலமாக இருக்கும் இந்த கீரை தொக்கு, எளிமையாகவும், விரைவாகவும் தயாரிக்கக்கூடிய ஒரு செய்முறையாகும். முருங்கைக்கீரை, கறிவேப்பிலை, கொத்தமல்லி ஆகியவற்றின் கலவையில் செய்யப்படும் இந்த தொக்கு, தனித்துவமான சுவையையும், வாசனையையும் கொடுக்கும். இந்த சுவையான தொக்கை எப்படி செய்வது என்று ரேகாஸ்குசினா யூடியூப் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

முருங்கைக்கீரை, கறிவேப்பிலை, கொத்தமல்லி
கடுகு, வெந்தயம், சீரகம், தனியா, காய்ந்த மிளகாய்
புளி (சின்ன நெல்லிக்காய் அளவு)
கல் உப்பு
நல்லெண்ணெய்
மஞ்சள் தூள்
பெருங்காயம்
பூண்டு (பொடியாக நறுக்கியது)
தண்ணீர் (அரை கப்)

செய்முறை:

முதலில், ஒரு கடாயில் கடுகு, வெந்தயம், சீரகம், தனியா மற்றும் காய்ந்த மிளகாயை வறுத்து, ஆறவைத்து பொடி செய்து கொள்ளவும். அதே கடாயில், முருங்கைக்கீரை, கறிவேப்பிலை, மற்றும் கொத்தமல்லியை ஈரப்பதம் போகும் வரை நன்கு வதக்கிக் கொள்ளவும். வதக்கிய கீரையுடன், நெல்லிக்காய் அளவு புளியை சேர்த்து வதக்கவும்.

பிறகு, வதக்கிய கீரை கலவையுடன், ஏற்கனவே அரைத்து வைத்த பொடி மற்றும் கல் உப்பு சேர்த்து கொரகொரப்பாக அரைத்துக் கொள்ளவும். இப்போது, ஒரு கடாயில் நல்லெண்ணெய், மஞ்சள் தூள், பெருங்காயம், மற்றும் நறுக்கிய பூண்டு சேர்த்து வதக்கவும். அதனுடன், அரைத்து வைத்த கீரை விழுதை சேர்த்து நன்கு வதக்கவும்.

கடைசியாக, அரை கப் தண்ணீர் சேர்த்து குறைந்த தீயில் ஐந்து நிமிடங்கள் எண்ணெய் பிரிந்து வரும் வரை கிளறவும். அவ்வளவுதான், சுவையான கீரை தொக்கு தயார். இதனை சூடான சாதம் மற்றும் இட்லியுடன் சேர்த்து பரிமாறலாம். ஆரோக்கியமான இந்த தொக்கு, உங்கள் குடும்பத்தினரின் விருப்பமான ஒன்றாக மாறும் என்பதில் சந்தேகமில்லை. இதனை சாதத்தோடு பிசைந்து லஞ்ச் பாக்ஸிற்கும் கொடுத்து விடலாம். வெறும் அப்பளம் அல்லது எதாவது ஒரு பொறியலோடு சேர்த்து சாப்பிடலாம்.