இட்லி மீந்து போச்சா? இப்படி முட்டை கொத்து போடுங்க; குழந்தைகள் விரும்பி சாப்பிடுவாங்க!

முட்டை கொத்து இட்லி என்பது ஒரு சுவையான மற்றும் எளிதில் செய்யக்கூடிய தென்னிந்திய உணவு. மீந்து போன இட்லிகளைக் கொண்டு இதைச் செய்யலாம். இது கொத்து பரோட்டாவைப் போலவே இருக்கும். இதை எப்படி செய்வது என்று சென்னை வெரைட்டி ஃபுட்ஸ் இன்ஸ்டா பக்கத்தில் கூறியிருப்பது போல எப்படி செய்வது என்று பார்ப்போம். 

தேவையான பொருட்கள்:

இட்லி - 6 முதல் 8  
முட்டை - 2-3
வெங்காயம் - 1 பெரியது  
தக்காளி - 1 சிறியது  
இஞ்சி பூண்டு விழுது - 1 டீஸ்பூன்
பச்சை மிளகாய் - 1-2  
கறிவேப்பிலை  
கொத்தமல்லி தழை  
மஞ்சள் தூள் - ¼ டீஸ்பூன்
மிளகாய் தூள் - ½ - 1 டீஸ்பூன்  
தனியா தூள் - ½ டீஸ்பூன் 
கரம் மசாலா தூள் - ¼ டீஸ்பூன் 
மிளகுத்தூள் - ½ டீஸ்பூன்
சோம்பு - ½ டீஸ்பூன்
எண்ணெய் - 2-3 டேபிள்ஸ்பூன்
உப்பு 

செய்முறை:

இட்லிகளை சிறு சிறு துண்டுகளாக உதிர்த்து அல்லது கத்தி கொண்டு பொடியாக நறுக்கி வைத்துக் கொள்ளுங்கள். ஒரு பெரிய கடாய் அல்லது அகலமான பாத்திரத்தை அடுப்பில் வைத்து எண்ணெய் ஊற்றி சூடாக்கவும்.

எண்ணெய் சூடானதும், சோம்பு சேர்த்து பொரிய விடவும். பின்னர், நறுக்கிய வெங்காயம் மற்றும் பச்சை மிளகாய் சேர்த்து பொன்னிறமாக வதக்கவும். வெங்காயம் சற்று வதங்கியதும், இஞ்சி பூண்டு விழுது சேர்த்து பச்சை வாசனை போகும் வரை நன்கு வதக்கவும். அடுத்து, நறுக்கிய தக்காளி சேர்த்து குழைய வதக்கவும்.

தக்காளி வதங்கியதும், மஞ்சள் தூள், மிளகாய் தூள், தனியா தூள், கரம் மசாலா தூள் சேர்த்து, பச்சை வாசனை போகும் வரை நன்கு வதக்கவும். மசாலா கருகாமல் பார்த்துக்கொள்ளுங்கள். 

மசாலா நன்கு வதங்கியதும், முட்டைகளை உடைத்து ஊற்றவும். உடனடியாகக் கிளறாமல், முட்டை லேசாக வேக ஆரம்பித்ததும், கரண்டியால் நன்கு கிளறி உதிர்த்து விடவும். முட்டை பொடிமாஸ் பதத்திற்கு வர வேண்டும்.

முட்டை நன்கு உதிரி உதிரியாக வந்ததும், உதிர்த்து வைத்துள்ள இட்லி துண்டுகளைச் சேர்த்து நன்கு கலக்கவும்.
இட்லி மற்றும் முட்டை மசாலாவில் நன்கு கலக்கும்படி, இரண்டு கரண்டிகளைப் பயன்படுத்தி கொத்தி விடுவது போல் கிளறவும். இது கொத்து பரோட்டாவுக்கு கொடுக்கும் அதே தன்மையை இட்லிக்கு கொடுக்கும்.

தேவையான அளவு உப்பு சேர்த்து, மிளகுத்தூள் தூவி மீண்டும் ஒரு முறை நன்கு கிளறி விடவும். 5 நிமிடங்கள் மிதமான தீயில் இட்லியை நன்கு பிரட்டவும், மசாலா இட்லியில் நன்கு ஒட்டிக்கொள்ளும் வரை வதக்கவும்.

இறுதியாக, நறுக்கிய கொத்தமல்லி தழை தூவி அடுப்பை அணைத்து விடவும். சுவையான முட்டை கொத்து இட்லி தயார். இதை அப்படியே சாப்பிடலாம் அல்லது சால்னா, ராய்தா போன்றவற்றுடன் பரிமாறலாம்.
 
இட்லி மிகவும் மிருதுவாக இருந்தால், சிறிது நேரம் ஆறவிட்டு, சற்று கெட்டியான பிறகு பயன்படுத்தவும். இது கொத்தும் போது குழைந்து போவதைத் தவிர்க்கும். சால்னா சேர்க்க விரும்பினால், கடைசியாக சால்னாவை சேர்த்து நன்கு கிளறி பரிமாறலாம். 

View this post on Instagram

A post shared by Chennai Variety Foods (@chennai_variety_foods)