3 மாதத்தில் 15 கிலோ வரை வெயிட் லாஸ்... இந்த தோசை ட்ரை செஞ்சு பாருங்க!

உடல் எடையைக் குறைக்க நினைப்பவர்களுக்கு, ஆரோக்கியமான உணவுப் பழக்கத்தைப் பின்பற்றுவது மிக அவசியம். அதிலும், திடீரென பசிக்கும்போது ஆரோக்கியமான சிற்றுண்டியைச் செய்து சாப்பிடுவது ஒரு சவாலான விஷயம். அப்படிப்பட்டவர்களுக்கு உதவக்கூடிய, அரிசியே சேர்க்கப்படாத, உடனடி மற்றும் மிகவும் சத்தான ஒரு ரெசிபிதான் இந்த பாசிப்பருப்பு தோசை. இது மிக எளிதாகத் தயாரிக்கக்கூடியது மட்டுமல்லாமல், சுவையிலும் சிறந்ததாக உள்ளது. உடல் எடையை விரைவில் குறைக்க நினைப்பவர்களுக்கு இது மிகவும் பயனுள்ள சிற்றுண்டியாக இருக்கும். இதனை எப்படி செய்வது என்று டெல்லிதமிழச்சி இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

பாசிப்பருப்பு  – 1 கப்
இஞ்சி – ஒரு சிறிய துண்டு
வரமிளகாய் – காரத்திற்கேற்ப
சீரகம்  – தேவையான அளவு
கொத்தமல்லி இலை  – சிறிது
கருவேப்பிலை – சிறிது
உப்பு – தேவையான அளவு
பெருங்காயத்தூள் – ஒரு சிட்டிகை

செய்முறை:

இந்த பாசிப்பருப்பு தோசையை மிகக் குறைந்த நேரத்தில் தயார் செய்து விடலாம். முதலில் ஒரு கப் பாசிப்பருப்பை எடுத்து, நன்கு கழுவிய பின், சுமார் ஒரு மணி நேரம் மட்டும் ஊற வைக்கவும். ஊறவைத்த பின், தண்ணீரை வடிகட்டிவிட்டு, ஒரு மிக்ஸி ஜாரில் பருப்பைப் போடவும். அதனுடன் இஞ்சி, வரமிளகாய், கொத்தமல்லி இலை, சீரகம், கருவேப்பிலை, தேவையான அளவு உப்பு மற்றும் பெருங்காயத்தூள் சேர்த்துக்கொள்ளவும்.

View this post on Instagram

A post shared by Vijay Vini (@delhitamizhachiofficial)

முதலில் தண்ணீர் சேர்க்காமல் கொரகொரப்பாக ஒரு சுற்று அரைத்துக்கொள்ளவும். பிறகு, சிறிது தண்ணீர் சேர்த்து, தோசை மாவு பதத்திற்கு (பேஸ்டாக) நன்கு அரைத்து எடுத்துக்கொள்ளவும். தோசை சுடுதல்: அரைத்த மாவில் நீர் அதிகம் சேர்க்கத் தேவையில்லை. மாவை எடுத்து உடனடியாக தோசைக் கல்லில் ஊற்றி, மெல்லியதாகவும் மொறுமொறுப்பாகவும் சுட்டு எடுக்கலாம். இந்த தோசைக்கு ஒரு துளி எண்ணெய் கூட போதும் (அ) சேர்க்காமலும் சுடலாம், இது மிகவும் சுவையாக இருக்கும். இதனை உங்கள் விருப்பத்திற்கேற்ற சட்னியுடன் சேர்த்துச் சாப்பிடலாம். உடல் எடை குறைக்க விரும்புபவர்களுக்கு இந்த தோசை ஏற்றதாக இருக்கும்.