வாயுத்தொல்லை இருக்காது... இந்த லஞ்ச் செய்ய வெறும் 5 நிமிஷம் தான்!

பூண்டு சாதம் என்பது வெறும் ருசியான உணவு மட்டுமல்ல, பல ஆரோக்கிய நன்மைகளையும் கொண்டது. எளிதில் செரிமானம் ஆகக்கூடிய இந்த உணவு, வாயுத்தொல்லை பிரச்னையில் இருந்து நிவாரணம் அளிக்கிறது. குறிப்பாக, மதிய உணவுக்கு ஒரு நிமிடத்தில் ஆரோக்கியமான மற்றும் சுவையான உணவைத் தயாரிக்க நினைப்பவர்களுக்கு இது ஒரு சிறந்த தேர்வு. வெறும் ஐந்து நிமிடங்களில் இந்த பூண்டு சாதத்தை எப்படி தயாரிப்பது என்று மெட்ராஸ் சமையல் யூடியூப் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்

பூண்டு - 15 பல்
சீரகம் - அரை தேக்கரண்டி
மிளகு - அரை தேக்கரண்டி
சமையல் எண்ணெய் - 1 தேக்கரண்டி
நெய் - 1 தேக்கரண்டி
கடுகு - அரை தேக்கரண்டி
உளுத்தம் பருப்பு - அரை தேக்கரண்டி
வேர்க்கடலை - 1 தேக்கரண்டி
காய்ந்த மிளகாய் - 2
கறிவேப்பிலை
வெங்காயம் - 1 (சிறியது)
பெருங்காயம் - ஒரு சிட்டிகை
சமைத்த சாதம் - 1 கப்
கொத்தமல்லி தழை - ஒரு கைப்பிடி
உப்பு - தேவைக்கேற்ப

செய்முறை:

முதலில், ஒரு கடாயில் எண்ணெய் மற்றும் நெய் சேர்த்து சூடாக்கவும். கடுகு, உளுத்தம் பருப்பு சேர்த்து வெடித்ததும், வேர்க்கடலை, காய்ந்த மிளகாய், கறிவேப்பிலை ஆகியவற்றைச் சேர்க்கவும். இப்போது, நசுக்கிய பூண்டு பற்களைச் சேர்த்து, அடுப்பை மிதமான தீயில் வைத்து வறுக்கவும். பூண்டு கருகாமல் பார்த்துக் கொள்ள வேண்டும். 

பிறகு, நறுக்கிய வெங்காயத்தைச் சேர்த்து, பூண்டு பொன்னிறமாகும் வரை வதக்கவும். பூண்டு பொன்னிறமானதும், புதிதாக நசுக்கிய சீரகம் மற்றும் மிளகுடன் பெருங்காயம் மற்றும் உப்பு சேர்த்து கிளறவும். இறுதியாக, சமைத்த சாதம் மற்றும் பொடியாக நறுக்கிய கொத்தமல்லி தழையை சேர்த்து, ஒரு தேக்கரண்டி நெய் விட்டு, அடுப்பை அதிக தீயில் வைத்து, 3-4 நிமிடங்கள் நன்றாகக் கிளறவும். இப்போது சுவையான பூண்டு சாதம் தயாராக உள்ளது. இதை வெங்காய பக்கோடா அல்லது உருளைக்கிழங்கு வறுவலுடன் பரிமாறலாம்.

பூண்டு சாதம் என்பது வெறும் ருசியான உணவு மட்டுமல்ல, பல ஆரோக்கிய நன்மைகளையும் கொண்டது. பூண்டில் உள்ள சல்பர் கலவைகள், வைட்டமின் சி, வைட்டமின் பி6, மாங்கனீஸ் மற்றும் செலினியம் போன்ற சத்துக்கள் உடலுக்கு பல நன்மைகளை வழங்குகின்றன. எளிதில் செரிமானம் ஆகக்கூடிய இந்த உணவு, வாயுத்தொல்லை பிரச்னையில் இருந்து நிவாரணம் அளிக்கிறது.