மணக்கும் மதுரை மல்லிகை இட்லி... ஒரு பாரம்பரிய காலை உணவு; இதை இப்படி செய்து பாருங்கள்

மதுரை என்றதும் நம் நினைவுக்கு வருவது மீனாட்சி அம்மன் கோவில் மட்டுமல்ல, அதன் பாரம்பரியமான உணவுகளும் தான். அதில் முக்கிய இடம் பிடிப்பது, மெல்லிசான, பஞ்சு போன்ற மல்லிகை இட்லி. மதுரையில் காலை நேரம் என்றால், வீதிதோறும் இட்லியின் மணம் கமழும்.

சிறிய தள்ளுவண்டிக் கடைகள் முதல் பெரிய உணவகங்கள் வரை, எல்லா இடங்களிலும் மல்லிகை இட்லி பிரதானமாக இருக்கும். இதை எப்படி எளிமையாக வீட்டிலேயே செய்யலாம் என்று மதுரை பொன்னு குக்கிங் சேனல் யூடியூப் பக்கத்தில் கூறியிருப்பது பற்றி பார்ப்போம்.

தேவையான பொருட்கள்:

இட்லி அரிசி - 5 கப்
பச்சரிசி - 1 கப்
அவல்- 1 கப்
வெந்தயம் - 1 தேக்கரண்டி
உளுத்தம் பருப்பு - 1 1/2 கப்
உப்பு

செய்முறை:

இட்லி அரிசி மற்றும் பச்சரிசியை நன்கு கழுவி, சுமார் 5-6 மணி நேரம் தண்ணீரில் ஊறவைக்கவும். உளுத்தம் பருப்பு மற்றும் வெந்தயத்தை 2 மணி நேரம் தண்ணீரில் ஊறவைக்கவும். அவலை 1 மணி நேரம் தண்ணீரில் ஊறவைக்கவும்.

ஊறவைத்த உளுத்தம் பருப்பில் இருந்து தண்ணீரை வடிகட்டி, கிரைண்டரில் சிறிது சிறிதாக தண்ணீர் சேர்த்து அரைக்கவும். மாவு பஞ்சு போலவும், நுரை போலவும் வரும் வரை சுமார் 30-40 நிமிடங்கள் அரைக்கவும். அரைத்த மாவை ஒரு பெரிய பாத்திரத்தில் எடுத்து தனியாக வைக்கவும்.

இப்போது ஊறவைத்த அரிசி மற்றும் அவலில் இருந்து தண்ணீரை வடிகட்டி, கிரைண்டரில் போதுமான தண்ணீர் சேர்த்து அரைக்கவும். மாவு மிகவும் மென்மையாக இருக்கக்கூடாது, சற்று கரடுமுரடாக இருக்க வேண்டும். இதற்கு சுமார் 20-30 நிமிடங்கள் ஆகலாம்.

இந்த அரிசி மாவையும் உளுத்தம் பருப்பு மாவுடன் சேர்த்து, தேவையான அளவு உப்பு சேர்த்து, கைகளால் நன்கு கலக்கவும். இது மாவு புளிப்பதற்கு உதவும். மாவு 8 முதல் 10 மணி நேரம் அல்லது இரவு முழுவதும் புளிக்க விடவும்.

இட்லி தட்டுகளில் நல்லெண்ணெய் தடவி, மாவை ஊற்றி, 10 முதல் 15 நிமிடங்கள் ஆவியில் வேகவைக்கவும். இப்போது மென்மையான மல்லிகைப்பூ இட்லி சாம்பார் மற்றும் சட்னியுடன் பரிமாறத் தயார்.