பள்ளிபாளையம் சிக்கனுக்கு டஃப் கொடுக்கும்... அந்த ஊரு ஸ்டைலில் இந்த சைடிஷ்: செஃப் தீனா ரெசிபி

நம்ம ஊர் ஸ்டைல்ல சுவையான காளான் பள்ளிப்பாளையம் எப்படி செய்யறதுன்னு பார்க்கலாமா! இது சிக்கன் பள்ளிப்பாளையம் மாதிரியே ரொம்ப ருசியா இருக்கும்.

தேவையான பொருட்கள்:

காளான் - 4 பாக்கெட் (சுமார் 800 கிராம்)

சின்ன வெங்காயம் - தேவையான அளவு (நறுக்கியது)

தக்காளி - 2 கிலோ (நறுக்கியது)

பச்சை மிளகாய் - 15 (முழுதாக)

தேங்காய் - 1/2 மூடி (நறுக்கியது - ஒரு காளானை நாலா அல்லது ஆறா வெட்டினால் எப்படி இருக்குமோ அதே மாதிரி)

இஞ்சி பூண்டு பேஸ்ட் - 50 கிராம்

கறிவேப்பிலை - 5 கொத்து

மஞ்சள்தூள் - 1 டீஸ்பூன்

சாம்பார் பொடி - 2 டீஸ்பூன்

உப்பு - தேவையான அளவு

எண்ணெய் (கடலை எண்ணெய்) - 100 ml

கடுகு - 1 டீஸ்பூன்

செய்முறை:

முதலில் அடுப்பை பற்ற வைத்து கடாயை வைக்கவும்.

கடாய் சூடானதும், 100 ml கடலை எண்ணெய் ஊற்றவும்.

எண்ணெய் காய்ந்ததும், கடுகு போடவும்.

கடுகு பொரிந்ததும், நறுக்கிய சின்ன வெங்காயத்தை சேர்த்து நன்றாக வதக்கவும். வெங்காயம் பொன்னிறமாக வதங்க வேண்டும்.

வெங்காயம் ஓரளவு வதங்கியதும், முழு பச்சை மிளகாயை சேர்க்கவும். உங்கள் காரத்திற்கு ஏற்ப மிளகாயின் அளவை கூட்டவோ குறைக்கவோ செய்யலாம்.

பிறகு நறுக்கிய தக்காளியை சேர்த்து வதக்கவும்.

அத்துடன் கறிவேப்பிலை தழையையும் சேர்த்து வதக்கவும். தக்காளி நன்றாக மசிய வேண்டும்.

தக்காளி வதங்கியதும், நறுக்கிய தேங்காயை சேர்க்கவும்.

தேங்காய் சேர்த்து சிறிது நேரம் வதக்கவும். எல்லாம் சேர்ந்து ஒரு தொக்கு போல வரும்.

இப்போது மஞ்சள்தூள் மற்றும் தேவையான அளவு உப்பு சேர்க்கவும். உப்பு சேர்த்தவுடன் எல்லாம் சேர்ந்து நன்றாக வதங்கிவிடும்.

கடைசியாக, காளான் போடுவதற்கு இரண்டு நிமிடத்திற்கு முன்பு இஞ்சி பூண்டு பேஸ்ட் சேர்க்கவும். இஞ்சி பூண்டு பேஸ்ட் போட்டவுடன் அடி பிடிக்க வாய்ப்புள்ளது, அதனால் உடனே அடுத்த கட்டத்திற்கு செல்லவும்.

இப்போது சாம்பார் பொடியை சேர்க்கவும்.

நன்றாக கழுவி, நான்கு அல்லது ஆறு துண்டுகளாக வெட்டி வைத்துள்ள காளானை கடாயில் சேர்க்கவும். காளானை அதன் காம்பு பகுதியோடு சேர்த்து வெட்டினால் பார்க்க முழுதாக இருக்கும்.

காளானை சேர்த்த பிறகு, மிதமான தீயில் வைத்து நன்றாக கிளறி விடவும். காளான் சீக்கிரம் வெந்துவிடும்.

காளான் நன்றாக வெந்து, மசாலாவுடன் கலந்து சுருண்டு வந்ததும் அடுப்பை அணைத்துவிடவும்.

சுவையான காளான் பள்ளிப்பாளையம் தயார்! சுடச்சுட பரிமாறவும்.

குறிப்பு:

காளானை சுத்தம் செய்யும்போது, அதிக தண்ணீரில் இரண்டு மூன்று முறை கழுவவும் அல்லது லேசாக உப்பு போட்டு கழுவலாம்.

விரும்பினால், காளானை மேலும் சுத்தப்படுத்த, ஒரு பாத்திரத்தில் தண்ணீர் ஊற்றி அதில் 2-3 ஸ்பூன் மைதா மாவு சேர்த்து கலந்து, காளானை அதில் புரட்டி எடுத்து, பின்னர் குழாய் நீரில் அலசலாம்.

சிக்கன் பள்ளிப்பாளையத்தில் சிக்கன் மசாலா சேர்ப்பார்கள். ஆனால் இந்த காளான் பள்ளிப்பாளையத்தில் சாம்பார் பொடி சேர்க்கிறோம்.

சிக்கன் பள்ளிப்பாளையத்திற்கு சின்ன வெங்காயத்தை முழுதாக சேர்ப்பார்கள். ஆனால் காளான் பள்ளிப்பாளையத்திற்கு நறுக்கி சேர்க்க வேண்டும்.

உங்கள் விருப்பத்திற்கு ஏற்ப காரத்தை கூட்டவோ குறைக்கவோ பச்சை மிளகாயின் அளவை மாற்றலாம்.