முடி உதிர்தலை தடுக்க வேண்டுமா... தூக்கி எறியப்படும் வெங்காயத்தோல் போதும் - டாக்டர் மைதிலி

சமையலில் வெங்காயத்தை பயன்படுத்திய பிறகு நாம் தூக்கி எறியும் வெங்காயத் தோலில் எண்ணற்ற ஊட்டச்சத்துக்களும், மருத்துவ குணங்களும் நிறைந்துள்ளதாக டாக்டர் மைதிலி தனது யூடியூப் பக்கத்தில் கூறி இருக்கிறார்.

வெங்காயத் தோலில் குர்செட்டின் என்ற சக்திவாய்ந்த ஆன்டிஆக்சிடன்ட் உள்ளது. இது உடலில் ஏற்படும் ஆக்சிஜனேற்ற அழுத்தத்தை எதிர்த்துப் போராடுகிறது. மேலும், புற்றுநோய் செல்களின் வளர்ச்சியைத் தடுத்து புற்றுநோயின் அபாயத்தைக் குறைக்கவும் உதவுகிறது.

குர்செட்டின் இதய ஆரோக்கியத்திற்கு மிகவும் நல்லது. இது இதய பாதிப்பு ஏற்படுவதற்கான அபாயத்தைக் குறைக்கிறது. கீல்வாதத்தால் ஏற்படும் வலி மற்றும் வீக்கத்தைக் குறைக்கவும், உடலின் நோய் எதிர்ப்பு சக்தியை அதிகரிக்கவும் உதவுகிறது.

வெங்காயத் தோலில் உள்ள சத்துக்கள் இரத்த அழுத்தத்தை சீராக வைத்திருக்கவும், குடலின் ஆரோக்கியத்தை மேம்படுத்தவும் உதவுகின்றன. எனவே, வெங்காயத் தோலை தூக்கி எறியாமல் பயன்படுத்துவது உடலுக்கு பல நன்மைகளைத் தரும்.

வெங்காயத் தோலை காய்கறி சூப்கள் அல்லது குழம்புகளில் சேர்த்து கொதிக்க வைத்து பின்னர் வடிகட்டி அந்த நீரை அருந்தலாம். இது சூப்பின் ஊட்டச்சத்து மதிப்பையும், சுவையையும் அதிகரிக்கும்.

வெங்காயத் தோலில் எல்-ட்ரிப்டோபன் என்ற அமினோ அமிலம் உள்ளது. இது உடலுக்கு தளர்வை அளிக்கிறது மற்றும் தூக்கத்தின் தரத்தை மேம்படுத்த உதவுகிறது. தூக்கப் பிரச்சினைகள் உள்ளவர்களுக்கு இது ஒரு இயற்கையான தீர்வாக இருக்கலாம்.

வெங்காயத் தோலில் உள்ள சத்துக்கள் முடி உதிர்வைக் குறைத்து முடி வளர்ச்சியை ஊக்குவிக்கின்றன. அதுமட்டுமின்றி, சரும ஆரோக்கியத்தையும் மேம்படுத்த உதவுகின்றன.

மெதுவாக குணமாகும் காயங்கள் அல்லது பிற தோல் பிரச்சினைகள் இருந்தால், வேகவைத்த வெங்காயத் தோலில் இருந்து தயாரிக்கப்பட்ட நீரைக் கொண்டு அந்தப் பகுதிகளை கழுவலாம். இது காயங்கள் விரைவில் ஆறவும், தோல் பிரச்சினைகள் குறையவும் உதவும்.

முடி உதிர்வை எதிர்த்துப் போராட, வெங்காயத் தோலை வேகவைத்த தண்ணீரை வடிகட்டி, அந்த நீரைக் கொண்டு தலைமுடியை அலசலாம். இது முடி உதிர்வைக் கட்டுப்படுத்த உதவும். முன்கூட்டியே முடி நரைப்பதைத் தடுக்க, வறுத்த மற்றும் அரைத்த வெங்காயத் தோலை தேங்காய் எண்ணெயுடன் கலந்து ஹேர் பேக் போல பயன்படுத்தலாம். இது முடியின் கருமையை பாதுகாக்க உதவும்.

ஆக, வெங்காயத் தோலை தூக்கி எறியாமல், அதை பல்வேறு வழிகளில் பயன்படுத்துவதன் மூலம் நாம் பல ஆரோக்கிய நன்மைகளை பெறலாம் என்கிறார். 

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.