சாஃப்ட் சப்பாத்திக்கு... தரமான சைடிஷ்; டேஸ்ட் வேற லெவலு!

வழக்கமான பன்னீர் உணவுகளுக்கு மாற்றுத் தேடலில் இருக்கிறீர்களா? அப்படியானால், காஷ்மீரி பாரம்பரியத்தில் உருவான, சுவை மிகுந்த பன்னீர் யாக்னியை நீங்கள் கண்டிப்பாக முயற்சிக்க வேண்டும். இது கிரீமியான, மசாலா நிறைந்த கிரேவி ஆகும். இதை சப்பாத்தி, ரொட்டி, நான் அல்லது பராத்தாவுடன் சேர்த்துச் சாப்பிட்டால், அதன் சுவை அலாதியானது. தனித்துவமான மசாலா கலவையுடன் தயார் செய்யப்படும் இந்த பன்னீர் யாக்னி செய்முறையை இங்கே பார்க்கலாம்.

தேவையான பொருட்கள்:

மசாலா தூள் செய்ய: காஷ்மீரி மிளகாய் - 5, மிளகு - 1 தேக்கரண்டி, சோம்பு - 1 தேக்கரண்டி, சீரகம் - 1 தேக்கரண்டி, கிராம்பு - 5, பட்டை - ஒரு சிறிய துண்டு, ஏலக்காய் - 2, தனியா - 1 1/2 மேசைக்கரண்டி

விழுது அரைக்க: தயிர் - 1 கப், பன்னீர் துண்டுகள் - 5, முந்திரி பருப்பு - 25 (ஊறவைத்தது)

பன்னீர் & காய்கறிகள் வறுக்க: நெய் - 2 தேக்கரண்டி, பன்னீர் - 400 கிராம், வெங்காயம் - 1 (நறுக்கியது), பச்சை குடைமிளகாய் - 1 (நறுக்கியது), சிவப்பு குடைமிளகாய் - 1 (நறுக்கியது)

பன்னீர் யாக்னி செய்ய: எண்ணெய் - 2 மேசைக்கரண்டி, நெய் - 2 மேசைக்கரண்டி, பிரியாணி இலை - 1, ஷாஹி ஜீரா - 1/2 தேக்கரண்டி, இஞ்சி பூண்டு விழுது - 1/2 தேக்கரண்டி, உப்பு - 1 தேக்கரண்டி, தண்ணீர் - 1 கப், கசூரி மேத்தி - 1 தேக்கரண்டி

செய்முறை: முதலில், மேலே பட்டியலிடப்பட்டுள்ள மசாலாப் பொருட்களை ஒரு கடாயில் ஒரு நிமிடம் வறுத்து, பின்னர் ஆறவிட்டு பொடியாக அரைத்துக்கொள்ளவும். மிக்ஸி ஜாரில் தயிர், ஐந்து பன்னீர் துண்டுகள், மற்றும் ஊறவைத்த முந்திரி பருப்பு சேர்த்து, ஒரு மென்மையான விழுதாக அரைக்கவும். ஒரு கடாயில் நெய் சேர்த்து, பன்னீர் துண்டுகளை பொன்னிறமாக வறுத்து தனியாக எடுத்து வைக்கவும். அதே கடாயில் நறுக்கிய வெங்காயம், பச்சை மற்றும் சிவப்பு குடைமிளகாய்களை இரண்டு நிமிடங்கள் வறுத்து அதையும் தனியாக எடுத்து வைக்கவும்.

பெரிய கடாயில் எண்ணெய் மற்றும் நெய் சேர்த்து, பிரியாணி இலை மற்றும் ஷாஹி ஜீரா சேர்த்து தாளிக்கவும். பின்னர், அரைத்த தயிர் விழுதைச் சேர்த்து, குறைந்த தீயில் இரண்டு முதல் மூன்று நிமிடங்கள் கிளறவும். இஞ்சி பூண்டு விழுது, அரைத்து வைத்த மசாலா தூள், மற்றும் உப்பு சேர்த்து நன்றாகக் கலக்கவும். பின்னர், ஒரு கப் தண்ணீர் ஊற்றி, 5 நிமிடங்கள் கொதிக்க விடவும். கிரேவி நன்றாகக் கொதித்ததும், வறுத்து வைத்துள்ள பன்னீர் மற்றும் காய்கறிகளைச் சேர்க்கவும். கடாயை மூடி, குறைந்த தீயில் 5 நிமிடங்கள் வேக விடவும். இறுதியாக, கைகளில் கசக்கிய கசூரி மேத்தி இலைகளை சேர்த்து கலக்கி அடுப்பை அணைக்கவும்.

View this post on Instagram

A post shared by HomeCookingTamil (@home.cooking.tamil)