4 கப் ரேசன் அரிசிக்கு 1 கப் உளுந்து... இவ்வளவு நேரம் ஊற வச்சாலே போதும்; பஞ்சு மாதிரி இட்லி கேரண்டி!

ரேஷன் அரிசி என்றாலே பலருக்கும் ஒரு சந்தேகம் எழுவதுண்டு அதில் எப்படி இட்லி மென்மையாகவும், பூ போல புசுபுசுவென்று வரும் என்ற கேள்விக்கு விடையாக, இந்த பதிவில் இட்லி மாவு தயாரிப்பது எப்படி என்று டீக்கடை கிச்சன் யூடியூப் பக்கத்தில் கூறியிருப்பது பற்றி பார்ப்போம். எளிமையான முறையில், உங்கள் வீட்டிலேயே மல்லிகைப்பூ இட்லி சுவைக்கு நிகரான மிருதுவான இட்லிகளை ரேஷன் அரிசியைப் பயன்படுத்தி எப்படித் தயாரிப்பது என்பதைப் படிப்படியாகக் காணலாம்.

தேவையான பொருட்கள்: 

ரேஷன் குண்டு இட்லி அரிசி: 4 கப்  
ரேஷன் பச்சரிசி: 2 கப்  
உளுந்து: 1 கப்  
வெந்தயம்: 1 டீஸ்பூன்
கல் உப்பு 
தண்ணீர் 

செய்முறை:

ரேஷன் அரிசியை ஒரு பெரிய பாத்திரத்தில் எடுத்து, முதலில் இரண்டு முறை சாதாரண தண்ணீரில் நன்கு அலசவும். பின்னர், ஒரு கைப்பிடி கல் உப்பைச் சேர்த்து, அரிசியை நன்கு கசக்கி, தேய்த்து அலசவும். இது அரிசியில் உள்ள அழுக்குகளை முழுமையாக நீக்கி, இட்லிக்கு நல்ல வெள்ளை நிறத்தைக் கொடுக்கும். இந்த செயல்முறையை 4 முதல் 5 முறை செய்ய வேண்டும். ரேஷன் அரிசி என்பதால், கூடுதல் கவனம் செலுத்தி நன்கு கழுவுவது அவசியம்.

கழுவிய அரிசியை ஒரு பெரிய பாத்திரத்தில் தேவையான அளவு தண்ணீர் ஊற்றி, குறைந்தது 4 மணி நேரம் ஊறவைக்க வேண்டும். ரேஷன் அரிசி சாதாரணமாக ஊற அதிக நேரம் எடுக்கும் என்பதை நினைவில் கொள்ளவும். 

அரிசி ஊறிய பின், அல்லது அரிசி ஊறிக்கொண்டிருக்கும் போது, உளுந்தை எடுத்து இரண்டு முறை கழுவவும். பின்னர் உளுந்துடன் வெந்தயத்தைச் சேர்த்து, 2 மணி நேரம் ஊறவைக்க வேண்டும். உளுந்து ஊறிய பிறகு, அந்த தண்ணீரையும் உளுந்தையும் குளிர்சாதனப் பெட்டியில் வைத்து குளிர்விக்கலாம். மாவு ஆட்டும்போது இந்த குளிர்ந்த நீரைப் பயன்படுத்தினால், மாவு இன்னும் நன்கு பொங்கி வரும்.

கிரைண்டரில் முதலில் ஊறிய வெந்தயத்தை மட்டும் சேர்த்து, 2 நிமிடங்கள் தனியாக அரைக்க வேண்டும். அடுத்து, வெந்தயத்துடன் உளுந்தையும் சேர்த்து, சிறிது சிறிதாக குளிர்ச்சியான நீரைத் தெளித்து, சுமார் 22 முதல் 25 நிமிடங்கள் வரை ஆட்ட வேண்டும். உளுந்து வெண்ணெய் போல மிருதுவாகவும், நன்கு பொங்கியும் வரும் வரை அரைப்பது அவசியம்.

இறுதியாக, ஊறிய அரிசியை கிரைண்டரில் சேர்த்து அரைக்க வேண்டும். அரிசி மாவு ரவையை விட சற்று கொரகொரப்பான பதத்தில் இருக்க வேண்டும். மாவு மிகவும் நைசாக அரைக்கப்பட்டால், இட்லி கடினமாகிவிடும் என்பதால், பதம் முக்கியம். 

அரைத்த உளுந்து மாவு மற்றும் அரிசி மாவு இரண்டையும் உப்பு சேர்க்காமல் ஒரு பெரிய பாத்திரத்தில் போட்டு நன்கு கலந்து விட வேண்டும். இந்த மாவை இரண்டு அல்லது மூன்று பாத்திரங்களில் பிரித்து ஊற்றி புளிக்க வைக்க வேண்டும். மாவு பாத்திரத்தில் இருந்து வழிந்து விடாதவாறு போதுமான இடைவெளி இருக்க வேண்டும். மாவு நன்கு புளித்து வரும் வரை காத்திருக்க வேண்டும். (பொதுவாக இரவு முழுவதும் புளிக்க விடலாம்).

மாவு நன்கு புளித்து வந்ததும், தேவையான அளவு உப்பு சேர்த்து நன்கு கலந்து விடவும். இட்லி ஊற்றுவதற்கு முன் ஒவ்வொரு தட்டிலும் மாவை ஊற்றுவதற்கு முன்பு, பாத்திரத்தில் உள்ள மாவை நன்கு கலந்து விட வேண்டும். இல்லையெனில், அரிசி மாவு அடியில் தங்கி, சில இட்லிகள் கடினமாகவும், சில இட்லிகள் மென்மையாகவும் வரக்கூடும்.

இட்லி பாத்திரத்தில் தண்ணீர் நன்கு கொதித்த பிறகு, இட்லி தட்டுகளில் மாவை ஊற்றி, அடுப்பில் வைத்து, சுமார் 10 நிமிடங்கள் ஆவியில் வேக வைக்கவும். இந்த எளிமையான மற்றும் குறிப்பான செய்முறையைப் பின்பற்றி, ரேஷன் அரிசியிலும் சூப்பரான, புசுபுசுப்பான, மல்லிகைப்பூ இட்லிகளைத் தயாரிக்கலாம்.