பாண்டிச்சேரி ஈவினிங் ஸ்நாக்ஸ்... மொறு மொறு பிரட் பஜ்ஜி; சிம்பிள் டிப்ஸ்!

பொதுவாக பஜ்ஜி என்றால் வாழைக்காய், வெங்காயம், மிளகாய் போன்றவற்றை கடலை மாவில் தோய்த்துப் பொரிப்பதுதான் வழக்கம். ஆனால், அதே பஜ்ஜிக்குள் மசாலா தடவிய உருளைக்கிழங்கு ஸ்டப்பிங்கை வைத்துச் செய்யும்போது அதன் சுவை பல மடங்கு அதிகரிக்கும். அதனை எப்படி செய்வது என்று சவுத் இந்தியன் இன்ஸ்டா பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

உருளைக்கிழங்கு - 2 
வெங்காயம் - 1  
பச்சை மிளகாய் - 1-2 
இஞ்சி பூண்டு விழுது - 1 தேக்கரண்டி
மஞ்சள் தூள் - 1/4 தேக்கரண்டி
மிளகாய் தூள் - 1/2 தேக்கரண்டி
கரம் மசாலா - 1/4 தேக்கரண்டி
மாங்காய் தூள் (ஆம்சூர் பவுடர்) - 1/2 தேக்கரண்டி 
கொத்தமல்லி இலை - சிறிதளவு
உப்பு - தேவையான அளவு
எண்ணெய் - 1 மேசைக்கரண்டி
பிரட் துண்டுகள் - 4-5
கடலை மாவு - 1 கப்
அரிசி மாவு - 2 மேசைக்கரண்டி
மிளகாய் தூள் - 1/2 தேக்கரண்டி
மஞ்சள் தூள் - 1 சிட்டிகை
பெருங்காயத் தூள் - 1 சிட்டிகை
ஓமம் (அஜ்வைன்) - 1/2 தேக்கரண்டி  
உப்பு - தேவையான அளவு
தண்ணீர் - தேவையான அளவு
எண்ணெய் - பொரிப்பதற்கு

செய்முறை:

ஒரு கடாயில் எண்ணெய் விட்டு சூடாக்கவும். வெங்காயம் மற்றும் பச்சை மிளகாய் சேர்த்து பொன்னிறமாக வதக்கவும். இஞ்சி பூண்டு விழுது சேர்த்து பச்சை வாசனை போக வதக்கவும். மஞ்சள் தூள், மிளகாய் தூள், கரம் மசாலா, மாங்காய் தூள் மற்றும் உப்பு சேர்த்து நன்கு கலக்கவும்.

இப்போது மசித்த உருளைக்கிழங்கை சேர்த்து, மசாலா உருளைக்கிழங்குடன் நன்கு கலக்கும் வரை வதக்கவும். இறுதியாக, பொடியாக நறுக்கிய கொத்தமல்லி இலைகளை தூவி அடுப்பை அணைக்கவும். மசாலா கலவை ஆறட்டும்.

ஒரு பாத்திரத்தில் கடலை மாவு, அரிசி மாவு, மிளகாய் தூள், மஞ்சள் தூள், பெருங்காயத் தூள், ஓமம் மற்றும் உப்பு சேர்த்து நன்கு கலக்கவும். பின்பு, சிறிது சிறிதாக தண்ணீர் சேர்த்து கட்டிகள் இல்லாமல் கெட்டியான மாவு பதத்திற்கு கரைக்கவும். மாவு இட்லி மாவை விட சற்று கெட்டியாக இருக்க வேண்டும்.

ஒரு பிரட் துண்டை எடுத்து, அதன் மீது உருளைக்கிழங்கு மசாலாவை சமமாக பரப்பவும். மற்றொரு பிரட் துண்டால் அதை மூடி, சாண்ட்விச் போல தயார் செய்யவும். இப்போது அந்த சாண்ட்விச்சை சதுரமாகவோ அல்லது முக்கோணமாகவோ இரண்டாக வெட்டவும்.

View this post on Instagram

A post shared by Praveen (@southindianasmr)

ஒரு கடாயில் எண்ணெய் ஊற்றி சூடாக்கவும். வெட்டிய பிரட் துண்டுகளை, பஜ்ஜி மாவில் இருபுறமும் நன்கு தோய்த்து, சூடான எண்ணெயில் மெதுவாக போடவும். நடுத்தர தீயில் வைத்து, இருபுறமும் பொன்னிறமாக மாறும் வரை பொரிக்கவும்.

பொரித்த பஜ்ஜியை எண்ணெய் உறிஞ்சும் தாளில் வைக்கவும். சுவையான உருளைக்கிழங்கு ஸ்டப்பிங் பிரட் பஜ்ஜி தயார்! இதை தக்காளி சாஸ் அல்லது புதினா சட்னியுடன் சூடாக பரிமாறலாம்.