ரோட்டுக்கடை சால்னா... ஈஸியா செஞ்சு முடிக்க 'நச்' டிப்ஸ்!

பரோட்டாவுக்கு இணையான சைடு டிஷ் எது என்று கேட்டால், பலருக்கும் முதலில் நினைவுக்கு வருவது சால்னாதான். அதுவும் ஹோட்டல் சுவையில் வீட்டு சமையலில் சால்னா செய்வது எப்படி என்று செஃப் ஷஞ்சித் தனது இன்ஸ்டா பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

தேங்காய்
வேர்க்கடலை
பொட்டுக்கடலை
கசகசா
சோம்பு
கடலை எண்ணெய்
பட்டை
கிராம்பு
கல்பாசி
பிரியாணி இலை
சோம்பு
வெங்காயம்
பச்சை மிளகாய்
கறிவேப்பிலை
தக்காளி
இஞ்சி
பூண்டு
கொத்தமல்லி 
புதினா 
மிளகு தூள்
சீரகத் தூள்
கரம் மசாலா தூள்
சிக்கன் அல்லது மட்டன்

செய்முறை:

ஒரு மிக்ஸியில் தேங்காய், வேர்க்கடலை, பொட்டுக்கடலை, கசகசா மற்றும் சோம்பு ஆகியவற்றைச் சேர்த்து நன்றாக அரைத்து விழுதாக்கிக் கொள்ளவும். இந்த விழுதை தனியாக ஒரு கிண்ணத்தில் எடுத்து வைக்கவும். ஒரு பெரிய பாத்திரத்தில் அல்லது குக்கரில் சிறிது கடலை எண்ணெயை சூடாக்கவும்.

எண்ணெய் சூடானதும், பட்டை, கிராம்பு, கல்பாசி, பிரியாணி இலை மற்றும் சோம்பு போன்ற முழு மசாலாப் பொருட்களைச் சேர்த்து தாளிக்கவும். அதன் பிறகு, நறுக்கிய வெங்காயம், பச்சை மிளகாய் மற்றும் கறிவேப்பிலை சேர்த்து பொன்னிறமாக வதக்கவும். வெங்காயம் வதங்கியதும், நறுக்கிய தக்காளி, இஞ்சி (சிறிதளவு) மற்றும் நிறைய பூண்டு சேர்த்து நன்கு வதக்கவும்.

பிறகு, சிறிதளவு கொத்தமல்லி மற்றும் நிறைய புதினா இலைகளைச் சேர்த்து வதக்கவும். வதக்கிய பொருட்கள் நன்கு வெந்ததும், மிளகு தூள் (சிறிதளவு), சீரகத் தூள் (நிறைய) மற்றும் கரம் மசாலா தூள் ஆகியவற்றைச் சேர்க்கவும். நீங்கள் சிக்கன் அல்லது மட்டன் சால்னா செய்ய விரும்பினால், இந்த நேரத்தில் இறைச்சியைச் சேர்த்து சுமார் 5 நிமிடங்களுக்கு சமைக்கவும்.

View this post on Instagram

A post shared by Litwin Shanjit (@chefshanjit)

தேவைக்கேற்ப தண்ணீர் சேர்த்து, இறைச்சி முழுமையாக வேகும் வரை சமைக்கவும். இறைச்சி முழுமையாக வெந்ததும், ஏற்கனவே அரைத்து வைத்த தேங்காய் விழுதை இதில் சேர்க்கவும். எல்லாம் சேர்ந்து நன்றாக கொதித்து வந்ததும், சுமார் ஐந்து நிமிடங்கள் கழித்து அடுப்பை அணைக்கவும். இப்போது உங்கள் சுவையான சால்னா பரிமாறத் தயாராக உள்ளது. இதை பரோட்டா, இட்லி, தோசை அல்லது சப்பாத்தியுடன் சேர்த்து சாப்பிடலாம்.