தயிர் சோறுக்கு செம்ம காம்பினேஷன்... சேப்பங்கிழங்கு வறுவல்!

சேப்பங்கிழங்கு என்பது சுவை மட்டும் அல்லாமல், பல்வேறு ஆரோக்கிய நன்மைகளை வழங்கும் ஒரு நன்மை மிகுந்த கிழங்கு வகையாகும்.

இதில் அதிக அளவில் நார்ச்சத்து உள்ளதால், இது செரிமான செயல்பாடுகளை மேம்படுத்துவதுடன், மலச்சிக்கல் போன்ற பிரச்சனைகளைத் தவிர்க்கவும் உதவுகிறது. 

மேலும், குறைந்த குளைசிமிக் குறியீடு கொண்டுள்ளதால், நீரிழிவு நோயாளிகளும் இதனை அளவோடு உட்கொள்ளலாம். கார்போஹைட்ரேட் சத்து அதிகம் இருப்பதால், இது உடலுக்கு தேவையான ஆற்றலை வழங்குகிறது, நாளாந்த பணிகளுக்குத் தேவையான சக்தியை நிரப்புகிறது.

மேலும், இதில் உள்ள வைட்டமின் பி6 மூளையின் செயல்பாட்டை தூண்டும் திறனைக் கொண்டுள்ளது. இதன் மூலம் மனஅழுத்தம், மனச்சோர்வு ஆகியவை குறைக்கப்படுவதோடு, மனநலத்தையும் மேம்படுத்துகிறது.

அதோடு, இது பசியைக் கட்டுப்படுத்தும் தன்மை கொண்டதால், அதிக உணவுகளைச் சாப்பிடும் பழக்கத்தை குறைத்து, உடல் எடையை கட்டுப்படுத்த உதவுகிறது.

இதில் காணப்படும் பொட்டாசியம், மாங்கனீஸ், தாமிரம், இரும்பு உள்ளிட்ட முக்கியமான தாதுச்சத்துக்கள் நம் உடலின் பல்வேறு இயக்கங்களை ஒழுங்காக செய்யும் வகையில் உடல் நலத்துக்கு உறுதுணையாக இருக்கின்றன.

எனவே, சேப்பங்கிழங்கை உணவில் அடிக்கடி சேர்ப்பது, உடல்நலத்திற்கும் சுறுசுறுப்புக்கும் பெரிதும் உதவக்கூடியது.

இப்படி பட்ட கிழங்கை வைத்து சுவையான ஒரு ரோஸ்ட் சுலபமாக வீட்டிலேயே எப்படி செய்யலாம் என்று பார்க்கலாம். 

தேவையான பொருட்கள்:

சேப்பங்கிழங்கு – ¼ கிலோ
எண்ணெய் – 2 மேசைஸ்பூன்
மிளகாய்த் தூள் – 1 மேசைஸ்பூன்
மஞ்சள் தூள் – ¼ டீஸ்பூன்
கறிவேப்பிலை – சிறிதளவு
உப்பு – தேவையான அளவு
பெருங்காயம் – ஒரு சிட்டிகை
கடுகு – ½ டீஸ்பூன் (தாளிக்க)

செய்முறை:

சேப்பங்கிழங்கை நன்கு கழுவி, வேக வைக்கவும் (மொத்தமாக வேக்க வேண்டாம் – கொஞ்சம் மென்மையாக இருக்க வேண்டும்). வெந்ததும் தோலை நீக்கி, வட்ட வட்டமாக வெட்டவும்.

ஒரு பாத்திரத்தில், மஞ்சள் தூள், மிளகாய்த் தூள், உப்பு சேர்த்து சேப்பங்கிழங்கை மசாலா உடன் நன்கு கலந்து 10 நிமிடம் ஊறவைக்கவும். கடாயில் எண்ணெய் ஊற்றி கடுகு, பெருங்காயம், கறிவேப்பிலை தாளிக்கவும். பிறகு சேப்பங்கிழங்கை அதில் சேர்த்து மிதமான தீயில் நன்கு திருப்பித் திருப்பி பொரிக்கவும்.

ஒவ்வொரு பக்கமும் வெந்து, நிறம் மாறி, ஓரளவு மொருமொருப்பாக ஆனதும் எடுத்து பரிமாறலாம்.

இது சூடான சாதம், தயிர் சாதம் அல்லது சாம்பாருடன் பரிமாற சிறந்த சைடு டிஷ் ஆகும்.