ஈஸியான வெங்காய துவையல்: உங்க சமையலுக்கு பாராட்டு வேணும்னா இப்படி செய்யுங்க!

நம் சமையலறையில் தவிர்க்க முடியாத ஓர் உணவுப்பொருள் வெங்காயம். சின்ன வெங்காயம், பெரிய வெங்காயம் தவிர்த்து, உலகம் முழுவதும் பல்வேறு வடிவங்களிலும் அளவுகளிலும் வெங்காயம் காணப்படுகின்றன. வெங்காயத்தின் மணம் மற்றும் நெடிக்குக் காரணம், அதில் கந்தகச் சத்து இருப்பதுதான். இதுதான், அதன் தோலை உரிப்பவர்களை அழ வைத்து விடுகிறது.

ரத்தத்தில் இருக்கக்கூடிய நச்சுகளை வெளியேற்றுவதற்கு உதவி செய்யும் வெங்காயத்தை அப்படியே சாப்பிட்டால், வைட்டமின் சி-யும் இன்னும் சில தாது உப்புக்களும் நம் உடலுக்குக் கிடைக்கும். அளவுக்கதிகமாக சாப்பிட்ட நாள்களில், கொஞ்சம் வெங்காயம் சாப்பிட்டால் எளிதில் ஜீரணமாகும். வெங்காயத்தைப் புற்றுநோய் பரவாமல் தடுத்து நிறுத்தும் ஓர் எல்லை வீரன் என்கின்றன ஆய்வுகள். வெங்காயத்தில் உள்ள `குயிர்செடின்’ எனும் ஆன்டி ஆக்ஸிடன்ட் பொருள், காய்ச்சல் முதல் புற்றுநோய் வரை எதுவும் நம் உடலைத் தாக்காமல் பாதுகாக்கக்கூடியது.

ரத்தக்குழாய்களில் கொழுப்புத் திட்டுகள் உருவாகாமல் தடுக்கும் ஆற்றலும் வெங்காயத்துக்கு உண்டு. உங்கள் உடலில் நல்ல கொழுப்பின் அளவை அதிகரிக்க, சமையலில் வெங்காயத்தை கூடுதலாகச் சேர்த்துக் கொள்ள வேண்டும். உடல்சூட்டைத் தணிக்க, வெங்காயத் துண்டுகளை நெய்விட்டு வதக்கிச் சுவைக்கலாம். இதே முறையில், வெள்ளை நிற பெரிய வெங்காயத்தைத் தொடர்ந்து சாப்பிட்டு வர, மூலநோய் கட்டுக்குள் இருக்கும்.

சிறுநீர் எரிச்சல் ஏற்படும்போது, வெங்காயத்தை ஒன்றிரண்டாக இடித்து குடிநீரில் போட்டுப் பருகலாம். நீரில் வெங்காயத்தைப்போட்டு கொதிக்கவைத்து, பனைவெல்லம் சேர்த்துச் சாப்பிட்டால், மாதவிடாய்க் காலத்தில் ஏற்படும் அடிவயிற்றுவலியைத் தவிர்க்கலாம். இதை வைத்து ஒரு சுதையான வெங்கையா துவையல் எப்படி செய்யலாம் என்று பார்க்கலாம் வாங்க. 

தேவையான பொருட்கள்

சின்ன வெங்காயம் - 200 கிராம்
காய்ந்த மிளகாய் - ௩
உளுத்தம்பருப்பு - 4 டீஸ்பூன்
புளி - ஒரு சிறிய நெல்லிக்காய் அளவு
எண்ணெய் - 4 டீஸ்பூன்
உப்பு - தேவையான அளவு.

செய்முறை:

சின்ன வெங்காயத்தை தோல் நீக்கி வைக்கவும். வாணலியில் எண்ணெய் விட்டு சூடானதும் காய்ந்த மிளகாய், உளுத்தம்பருப்பை தனித்தனியா போட்டு வறுக்கவும். அடுத்து வெங்காயத்தை சேர்த்து வதக்கி ஆறவைக்கவும். பிறகு, எல்லாவற்றையும் ஒன்றுசேர்த்து, உப்பு, புளி சேர்த்து மிக்ஸியில் அரைக்கவும்.

இப்போது ருசியான வெங்காய துவையல் ரெடி!