சண்டே ஸ்பெஷல்: திண்டுக்கல் தலப்பாக்கட்டி பிரியாணி... சோயா சேர்த்து இப்படி செஞ்சு அசத்துங்க!

திண்டுக்கல் தலப்பாக்கட்டு சோயா பிரியாணி, அதன் தனித்துவமான சுவைக்காகப் பலராலும் விரும்பப்படுகிறது. இந்த பிரியாணியின் சுவைக்கு, பிரெஷ்ஷாக அரைத்த மசாலாப் பொருட்களே முக்கியக் காரணம். இந்த பிரியாணியை சமைத்துப் பார்த்தால் தான், இதன் அற்புதமான சுவை எந்த அளவிற்கு மக்களைக் கவர்ந்துள்ளது என்பதைப் புரிந்துகொள்ள முடியும். எப்படி செய்யலாம் என்று பார்ப்போமா?

தேவையான பொருட்கள்:

சீரகச் சம்பா அரிசி

சோயா துண்டுகள்

பூண்டு

சின்ன வெங்காயம்

கொத்தமல்லி

இஞ்சி

புதினா

பச்சை மிளகாய்

கிராம்பு, சோம்பு

வெங்காயம்

தக்காளி

உப்பு

பிரியாணி மசாலா

தண்ணீர்

தயிர்

எண்ணெய்/நெய்

எலுமிச்சைச் சாறு

செய்முறை:

முதலில், சீரக சம்பா அரிசியைக் கழுவி ஊறவைத்துக் கொள்ளவும். சோயா துண்டுகளைச் சுடுநீரில் போட்டு ஊறவைத்து, தண்ணீரை வடித்து தனியே எடுத்து வைக்கவும்.

இந்த பிரியாணியின் சிறப்பம்சமே, அதன் மசாலாதான். முதலில், பூண்டு, சின்ன வெங்காயம், கொத்தமல்லி, இஞ்சி, புதினா, மற்றும் பச்சை மிளகாய் ஆகியவற்றை ஒன்றாகச் சேர்த்து விழுதாக அரைத்துக்கொள்ளவும்.

View this post on Instagram

A post shared by Vidya Srinivasan (@traditionallymodernfood)

ஒரு பெரிய பாத்திரத்தில் எண்ணெய் அல்லது நெய் விட்டு, கிராம்பு மற்றும் சோம்பு சேர்த்துப் பொரிய விடவும். பிறகு, நறுக்கிய வெங்காயத்தைச் சேர்த்துப் பொன்னிறமாக வதக்கவும். அடுத்ததாக, அரைத்து வைத்த புதினா விழுதைச் சேர்த்து, அதன் பச்சை வாசனை போகும் வரை நன்றாக வதக்கவும்.

பின்னர், தக்காளி, உப்பு, மற்றும் பிரியாணி மசாலா சேர்த்து நன்கு வதக்கவும். இதனுடன், வடித்து வைத்த சோயா துண்டுகள் மற்றும் தயிர் சேர்த்து, எண்ணெய் பிரிந்து வரும் வரை சமைக்கவும்.

இப்போது, தேவையான அளவு தண்ணீர் சேர்த்து, நன்கு கொதித்ததும், ஊறவைத்த அரிசியைச் சேர்க்கவும். அரிசி பாதி வெந்ததும், எலுமிச்சைச் சாறு சேர்த்து, மூடி போட்டு சமைக்கவும். அடுப்பைக் குறைந்த தீயில் வைத்து, தம் போட்டு எடுக்கவும்.