வெறும் 50 ரூபாய் போதும்... டேஸ்டி '65' சைடிஷ் ரெடி!

சிக்கன் 65 போல அதே சுவையில், வெறும் 50 செலவில் முட்டையை வைத்து முட்டை கிரீன் 65 எப்படி செய்வது என்று பார்ப்போம். அசல் சிக்கன் 65 சுவையில் இது நிச்சயம் உங்களை ஆச்சரியப்படுத்தும். கட்டாயம் முயற்சி செய்து பாருங்கள்!

தேவையான பொருட்கள்:

முட்டை - 3

உப்பு - தேவையான அளவு

மிளகுத்தூள் - 1/2 டீஸ்பூன்

கரம் மசாலா - 1/2 டீஸ்பூன்

கடலை மாவு - 2 டேபிள்ஸ்பூன்

அரிசி மாவு - 1 டேபிள்ஸ்பூன்

கான்ஃப்ளார் - 1 டேபிள்ஸ்பூன்

மஞ்சள் தூள் - 1/4 டீஸ்பூன்

எண்ணெய் - பொரிப்பதற்கு

அரைப்பதற்கு:

புதினா - ஒரு கைப்பிடி

பச்சை மிளகாய் - 2-3 (காரத்திற்கு ஏற்ப)

கறிவேப்பிலை - சிறிதளவு

கொத்தமல்லி - ஒரு கைப்பிடி

இஞ்சி பூண்டு விழுது - 1 டீஸ்பூன்

தண்ணீர் - சிறிதளவு

செய்முறை:

ஒரு கிண்ணத்தில் மூன்று முட்டைகளை உடைத்து ஊற்றி, அதனுடன் உப்பு, மிளகுத்தூள், கரம் மசாலா சேர்த்து நன்றாக அடித்துக் கலக்கவும். எண்ணெய் தடவிய ஒரு சிறிய கிண்ணத்திலோ அல்லது டிபன் பாக்ஸிலோ இந்த முட்டைக் கலவையை ஊற்றி, இட்லி தட்டில் வைத்து, 15 நிமிடங்கள் ஆவியில் வேக வைக்கவும்.

நன்றாக வெந்ததும், முட்டை ஆம்லெட்டை எடுத்து சிறு சிறு துண்டுகளாக வெட்டி வைத்துக் கொள்ளவும். இப்போது மிக்ஸி ஜாரில் புதினா, பச்சை மிளகாய், கறிவேப்பிலை, கொத்தமல்லி, இஞ்சி பூண்டு விழுது சேர்த்து, சிறிதளவு தண்ணீர் தெளித்து விழுதாக அரைத்துக் கொள்ளவும்.

ஒரு அகலமான பவுலில் கடலை மாவு, அரிசி மாவு, கான்ஃப்ளார், உப்பு, மஞ்சள் தூள், கரம் மசாலா சேர்த்து, நாம் அரைத்து வைத்துள்ள புதினா விழுதையும் சேர்க்கவும். தண்ணீர் சேர்க்காமல் இந்த மாவை கெட்டியாகப் பிசைந்து கொள்ளவும்.

View this post on Instagram

A post shared by Kaathuvaakula_samayal (@kaathuvaakulasamayal)

வெட்டி வைத்துள்ள முட்டைத் துண்டுகளை இந்த மாவுடன் சேர்த்து நன்றாகக் கலந்து கொள்ளவும். ஒரு கடாயில் எண்ணெய் ஊற்றி சூடாக்கி, கலந்து வைத்துள்ள முட்டைத் துண்டுகளைப் போட்டு, இருபுறமும் பொன்னிறமாக, மொறுமொறுப்பாகும் வரை பொரித்து எடுக்கவும்.

கடைசியாக, சுவைக்காக சிறிதளவு கறிவேப்பிலையை எண்ணெயில் பொரித்து, பொரித்த முட்டை கிரீன் 65 மேல் தூவி பரிமாறவும். சுவையான முட்டை கிரீன் 65 தயார்! இது சிக்கன் 65 போன்றே இருக்கும். கட்டாயம் வீட்டிலேயே செய்து பார்த்து மகிழுங்கள்!