புசு புசு இட்லிக்கு... தரமான சாம்பார்; ஈஸி ஸ்டெப்ஸ்!

இட்லிக்கு தொட்டுக்க என்ன செய்யலாம்னு யோசிக்கிறீங்களா? அப்போ, இந்த சூப்பரான ஹோட்டல் ஸ்டைல் டிபன் சாம்பார் செஞ்சு பாருங்க. ரொம்ப சுலபமா, சட்டுனு செஞ்சிடலாம்.

தேவையான பொருட்கள்:

பாசிப்பருப்பு - 1/2 கப்

துவரம்பருப்பு - ஒரு கைப்பிடி

வெங்காயம் - 1 (நறுக்கியது)

பச்சை மிளகாய் - 2-3

மஞ்சள் தூள் - 1 டீஸ்பூன்

சீரகம் - 1 டீஸ்பூன்

வெந்தயம் - 1/2 டீஸ்பூன்

தக்காளி - 3 (நடுவில் வெட்டியது)

தண்ணீர் - 2 கப்

உப்பு - தேவைக்கேற்ப

கொத்தமல்லி இலை - ஒரு கைப்பிடி

தாளிப்பதற்கு:

எண்ணெய் - 2 டீஸ்பூன்

கடுகு - 1 டீஸ்பூன்

நறுக்கிய வெங்காயம் - 1 (சிறியது)

கறிவேப்பிலை - சிறிது

சாம்பார் தூள் - 1 டீஸ்பூன்

காய்ந்த மிளகாய் - 2

செய்முறை:

முதலில், ஒரு குக்கரில் பாசிப்பருப்பு, துவரம்பருப்பு, நறுக்கிய வெங்காயம், பச்சை மிளகாய், மஞ்சள் தூள், சீரகம், வெந்தயம், பெருங்காயம் மற்றும் தண்ணீர் சேர்த்து, 4 விசில் வரும் வரை வேக விடவும்.ஆவி முழுமையாக அடங்கியதும், குக்கரை திறந்து தக்காளியின் தோலை நீக்கி, பருப்பை லேசாக மசிக்கவும்.

View this post on Instagram

A post shared by Kayus Kitchen (@kayus_kitchen)

சாம்பார் தேவையான பக்குவத்திற்கு வர, கொஞ்சம் தண்ணீர் சேர்த்து நன்கு கலக்கவும். பிறகு, தேவையான அளவு உப்பு சேர்த்து 6-7 நிமிடங்கள் கொதிக்க விடவும். பின்னர் அடுப்பை அணைக்கவும்.தாளிப்பதற்கு, ஒரு சிறிய கடாயில் எண்ணெய் ஊற்றி, கடுகு, வெங்காயம், கறிவேப்பிலை, சாம்பார் தூள் மற்றும் காய்ந்த மிளகாய் சேர்த்து வதக்கவும்.

வெங்காயம் பொன்னிறமானதும், இந்த தாளிப்பை சாம்பாரில் கொட்டி நன்கு கலக்கவும். கடைசியாக, நறுக்கிய கொத்தமல்லி இலைகளை தூவி, ஒருமுறை கலந்து பரிமாறவும். சுடச்சுட இட்லி அல்லது தோசையுடன் இந்த டிபன் சாம்பாரை பரிமாறி மகிழுங்கள்.