மதுரை ஸ்டைல் சாம்பார்... வீடே மணக்க இப்படி செய்யுங்க!

சாம்பார் எவ்வளவு செய்தாலும் சுவையாக வரவில்லையே என்று கவலைப்படுகிறீர்களா? அப்படியென்றால், இந்த குறிப்புகளைப் பின்பற்றி மதுரை மண்ணின் மணத்துடன் கூடிய, சூப்பரான வெண்டைக்காய், முருங்கைக்காய், மாங்காய் போட்ட சாம்பாரைச் செய்து அசத்தலாம் வாங்க.

தேவையான பொருட்கள்:

வெண்டைக்காய் - 300 கிராம்

துவரம்பருப்பு - 200 கிராம்

சின்ன வெங்காயம் - 1 கப்

தக்காளி - 2

மஞ்சள்தூள் - 1/2 தேக்கரண்டி

மல்லித்தூள் - 1 தேக்கரண்டி

முருங்கைக்காய் - 1 (நடுத்தர அளவு)

மாங்காய் - 1/2 (சிறிய அளவு)

புளிக்கரைசல் - எலுமிச்சை அளவு புளியிலிருந்து எடுத்தது

சாம்பார் தூள் - 2 தேக்கரண்டி

உப்பு - தேவையான அளவு

தண்ணீர் - 2-3 டம்ளர்

தாளிக்க:

எண்ணெய் - 2 தேக்கரண்டி

கடுகு - 1/2 தேக்கரண்டி

உளுத்தம்பருப்பு - 1/2 தேக்கரண்டி

சீரகம் - 1/2 தேக்கரண்டி

பெருங்காயத்தூள் - 1/4 தேக்கரண்டி

சின்ன வெங்காயம் - சிறிது

தக்காளி - சிறிது

கறிவேப்பிலை - சிறிதளவு

கொத்தமல்லித்தழை - சிறிதளவு

செய்முறை:

முதலில், 200 கிராம் துவரம்பருப்பை வெறும் வாணலியில் நன்கு வறுத்து எடுக்கவும். வறுத்த பருப்பை குக்கரில் சேர்த்து, அதனுடன் நறுக்கிய சின்ன வெங்காயம், தக்காளி, மஞ்சள்தூள், மல்லித்தூள் சேர்த்து 2-3 டம்ளர் தண்ணீர் ஊற்றி, 3 விசில் வரும் வரை வேக விடவும். இப்படி வறுத்து வேகவைப்பது சாம்பாருக்கு அருமையான சுவையைக் கொடுக்கும்.

வெண்டைக்காயை 300 கிராம் எடுத்து, கடாயில் சிறிது எண்ணெய் ஊற்றி நன்கு வதக்கவும். பிறகு, முருங்கைக்காய் மற்றும் மாங்காயையும் தனித்தனியாக வதக்கி தனியே எடுத்து வைக்கவும். பருப்பு நன்கு வெந்ததும், அதனுடன் வதக்கி வைத்துள்ள வெண்டைக்காய், முருங்கைக்காய், மாங்காய் அனைத்தையும் சேர்க்கவும்.

View this post on Instagram

A post shared by 🇸​🇷​🇮​ 🇧​🇦​🇻​🇦​ 9️⃣​9️⃣​9 (@sri_bava_99)

பின்னர், 2 தேக்கரண்டி சாம்பார் தூள், தேவையான அளவு உப்பு மற்றும் புளிக்கரைசல் சேர்த்து நன்கு கலக்கவும். எல்லாவற்றையும் ஒன்றாகச் சேர்த்து கொதிக்க விடவும். ஒரு வாணலியில் எண்ணெய் ஊற்றி, கடுகு, உளுத்தம்பருப்பு, சீரகம், பெருங்காயத்தூள் சேர்த்துத் தாளிக்கவும். அதனுடன் சிறிது சின்ன வெங்காயம், தக்காளி, கறிவேப்பிலை, கொத்தமல்லித்தழை சேர்த்து நன்கு வதக்கவும்.

இந்தத் தாளிப்பை கொதித்துக் கொண்டிருக்கும் சாம்பாரில் சேர்த்து ஒரு முறை கலக்கி, இறக்கினால் சுவையான மதுரை சாம்பார் தயார்! இனி உங்கள் வீட்டிலேயே சூப்பரான சாம்பார் செய்து அசத்தலாம்!