மோரில் அவல் ஊறவைத்து... ஸ்பான்ஞ் தோசை ஒரு முறை இப்படி பண்ணுங்க: வெங்கடேஷ் பட் ரெசிபி

நாம் தினமும் ஒரே மாதிரியான மாவில் தோசை ஊற்றி சாப்பிட்டு சலித்திருப்போம். எனவே வித்தியாசமாக, டேஸ்ட்டாக தோசை சாப்பிட வேண்டும் நினைப்பவர்கள் இந்த ரெசிபியை டிரை பண்ணலாம். பஞ்சு போன்ற ஸ்பான்ஞ் தோசையும் அதனுடன் பூண்டு சட்னியும் சேர்ந்து இருந்தால் 6-7 தோசை அசால்ட்டாக சாப்பிடலாம்.

இந்த சூப்பர் ரெசிபியை செஃப் வெங்கடேஷ் பட் தனது யூடியூப் சேனலில் விவரித்துள்ளார். அதன்படி,

தேவையான பொருட்கள் 

மோர் – 1 டம்ளர்

அவல் – ½ அவல்

அரிசி – 1 டம்ளர்

நல்லெண்னெய் – தேவையான அளவு

சின்ன வெங்காயம் – 15

பூண்டு – 40 பற்கள்

மங்களூர் காய்ந்த மிளகாய் – 12

கடுகு – 1 டீஸ்பூன்

கறிவேப்பிலை – தேவையான அளவு

புளி – 25 கிராம்

வெல்லம் – 30-40 கிராம்

உப்பு – தேவையான அளவு

பெருங்காயம் – 1 சிட்டிகை

செய்முறை

முதலில் புளித்த மோரில் அவல் சேர்த்து 3-4 மணி நேரம் ஊறவைக்க வேண்டும். மற்றொரு பாத்திரத்தில் அரிசியை தனியாக ஊறவைத்துக் கொள்ள வேண்டும். 3-4 மணி நேரம் ஊறிய பின்னர் மிக்ஸி அல்லது க்ரைண்டரில் போட்டு ஆப்பம் மாவு பதத்திற்கு அரைத்துக் கொள்ள வேண்டும். இதனை 8 மணி நேரம் உப்பு சேர்த்து புளிக்க வைக்க வேண்டும்.

அடுத்ததாக தோசை ஊற்றும் முன் பூண்டு சட்னி செய்துக் கொள்ளலாம். அதற்கு ஒரு வாணலியை அடுப்பில் வைத்து சூடான பின் நல்லெண்னெய் ஊற்றி காய வைக்க வேண்டும்.

காய்ந்த பின்னர் வெங்காயம், பூண்டு சேர்த்து வதக்க வேண்டும். பொன்னிறமாக வந்தவுடன் மிளகாய் சேர்த்து வதக்கிக் கொள்ள வேண்டும். வதங்கிய உடன் அடுப்பில் இருந்து இறக்கி ஆறியவுடன் மிக்ஸியில் போட்டு நன்றாக அரைத்துக் கொள்ள வேண்டும். 

அடுத்தாக அடுப்பில் ஒரு வாணலியை வைத்து சூடானதும் நல்லெண்னெய் ஊற்றி காய வைக்க வேண்டும். பின்னர் கடுகு, கறிவேப்பிலை சேர்த்து பொரிய வைக்க வேண்டும். தொடர்ந்து இதில் அரைத்து வைத்த கலவையை சேர்த்து கிளற வேண்டும்.

இதனுடன் புளிக்கரைசல் மற்றும் வெல்லம் சேர்த்து கொதிக்க வேண்டும். மேலும் தேவையான அளவு உப்பு மற்றும் பெருங்காயத் தூள் சேர்த்து கொதிக்க வைத்து இறக்கி வைத்துக் கொள்ள வேண்டும். 

பின்னர் தோசை மாவை சூடான தோசைக்கல்லில் ஊற்ற வேண்டும். இளம்சூட்டில் மாவை வேகவைத்து, திருப்பி போட்டு வேக வைத்து எடுத்துக் கொள்ள வேண்டும். தேவைப்பட்டால் நெய் சேர்த்துக் கொள்ளுங்கள்.

அவ்வளவு தான் டேஸ்டியான ஸ்பான்ஞ் தோசை மற்றும் பூண்டு சட்னி ரெடி. நீங்களும் உங்கள் வீட்டில் செய்து பாருங்கள்.