பீட்ரூட்டில் இப்படி ஒரு ரசம்; இப்போ ட்ரெண்டிங் ரெசிபி இதுதான்; நீங்களும் ட்ரை பண்ணலாமே!

பீட்ரூட்டில் உள்ள நைட்ரேட்டுகள் மூளைக்குச் செல்லும் இரத்த ஓட்டத்தை மேம்படுத்துகின்றன. இதனால் மூளையின் செயல்பாடுகள் சிறப்பாக இருக்கும். பீட்ரூட்டில் உள்ள பீட்டாலைன்கள் (Betalains) வீக்கத்திற்கு எதிரான பண்புகளைக் கொண்டுள்ளன. இது உடலில் ஏற்படும் வீக்கத்தைக் குறைத்து, மூட்டு வலி போன்ற பிரச்சனைகளில் இருந்து நிவாரணம் அளிக்கும். இந்த பீட்ரூட்டில் ரசம் வைப்பது எப்படி என்பதை பார்ப்போமா?

தேவையான பொருட்கள்

ஒரு பெரிய பீட்ரூட்

ஒரு தக்காளி

ஒரு சிறிய நெல்லிக்காய் அளவு புளி

ஒரு சிட்டிகை மஞ்சள் தூள்

உப்பு தேவையான அளவு

சிறிதளவு கொத்தமல்லி இலை

தாளிக்க: எண்ணெய், கடுகு, உளுத்தம் பருப்பு, கறிவேப்பிலை, பெருங்காயத் தூள்

மசாலா இடிக்க:

மிளகு - 1 ஸ்பூன்

சீரகம் - 1 ஸ்பூன்

பூண்டு - 5 பல்

சின்ன வெங்காயம் - 5

செய்முறை

முதலில் ஒரு பீட்ரூட்டை நன்கு கழுவி, குக்கரில் போட்டு, ஒரு சிட்டிகை மஞ்சள் தூள் மற்றும் தேவையான அளவு உப்பு சேர்த்து, மூன்று விசில் வரும் வரை வேகவிடுங்கள். பீட்ரூட் நன்கு வெந்ததும், அதை எடுத்து ஆறவைத்து மிக்ஸியில் அரைத்துக்கொள்ளுங்கள்.

ஒரு தக்காளி மற்றும் ஒரு சிறிய நெல்லிக்காய் அளவு புளியை தனியாக ஊறவைத்துக் கொள்ளுங்கள். இப்போது, மிளகு, சீரகம், பூண்டு, மற்றும் சின்ன வெங்காயம் ஆகியவற்றை உரலில் போட்டு ஒன்றிரண்டாக இடித்துக்கொள்ளுங்கள். உரல் இல்லையென்றால், மிக்ஸியில் கொரகொரப்பாக அரைத்துக்கொள்ளலாம்.

அரைத்த பீட்ரூட் விழுது, இடித்த மசாலா, மற்றும் புளி-தக்காளி கரைசல் ஆகியவற்றை ஒரு பாத்திரத்தில் சேர்த்து, தேவையான அளவு உப்பு மற்றும் சிறிதளவு கொத்தமல்லி இலைகளைச் சேர்க்கவும். இந்த கலவையை நன்கு கலக்கி வடிகட்டி, சக்கைகளைத் தனியாக எடுத்து வையுங்கள்.

இப்போது, ஒரு மண் சட்டியை அடுப்பில் வைத்து, எண்ணெய் ஊற்றி, கடுகு, உளுத்தம் பருப்பு, கறிவேப்பிலை, மற்றும் பெருங்காயத் தூள் சேர்த்துத் தாளிக்கவும். தாளித்ததும், வடிகட்டிய சக்கைகளைப் போட்டு நன்கு வதக்குங்கள். அதன் பச்சை வாசனை போனதும், வடிகட்டி வைத்திருந்த பீட்ரூட் ரசத்தை அதனுடன் சேர்க்கவும். ரசத்தில் நுரை பொங்கி வரும்போது அடுப்பை அணைத்துவிடுங்கள். அவ்வளவுதான், சுவையான பீட்ரூட் ரசம் தயார்!