பஞ்சு மாதிரி சாஃப்ட் கொழுக்கட்டை... வீட்டில் அரைத்த மாவு போதும்!

விநாயகர் சதுர்த்தி ஸ்பெஷல் கொழுக்கட்டை செய்முறை

தேவையான பொருட்கள்

அரிசி மாவு - 1 கப்

தண்ணீர் - 1 கப்

பால் - ½ கப்

உப்பு - ஒரு சிட்டிகை

நெய் - ¼ தேக்கரண்டி

பூரணம் (Stuffing) செய்வதற்கு:

துருவிய தேங்காய் - 1 கப்

நாட்டு சர்க்கரை - ½ கப்

நெய் - ½ தேக்கரண்டி

ஏலக்காய் பொடி - சிறிதளவு

செய்முறை

ஒரு வாணலியை அடுப்பில் வைத்து, அதில் நெய் ஊற்றி சூடாக்கவும். நெய் உருகியதும், துருவிய தேங்காய் சேர்த்து நன்கு வதக்கவும். தேங்காய் சற்று வதங்கியதும், நாட்டு சர்க்கரை சேர்த்து நன்றாக கலக்கவும். சர்க்கரை உருகி தேங்காயுடன் சேர்ந்து ஒட்டாமல் வரும் வரை கிளறவும். கடைசியாக, ஏலக்காய் பொடி சேர்த்து அடுப்பை அணைக்கவும். பூரணத்தை ஆறவிடவும்.

அடுப்பில் ஒரு பாத்திரத்தை வைத்து, தண்ணீர், பால், உப்பு மற்றும் நெய் சேர்த்து கொதிக்க விடவும். கலவை நன்கு கொதித்ததும், அடுப்பை சிம்மில் வைத்து, அரிசி மாவை கொஞ்சம் கொஞ்சமாக சேர்த்து கட்டிகள் இல்லாமல் கிளறவும். மாவு நன்கு வெந்து, பாத்திரத்தில் ஒட்டாமல் ஒரு உருண்டையாக வரும் போது அடுப்பை அணைத்து, மாவை ஒரு தட்டில் பரப்பி ஆறவிடவும்.

View this post on Instagram

A post shared by Suryaskitchen (@suryaskitchen2)

மாவு வெதுவெதுப்பான சூட்டில் இருக்கும்போதே, அதை நன்கு பிசைந்து மிருதுவான மாவாக மாற்றவும். பிசைந்த மாவில் இருந்து சிறிய உருண்டைகளை எடுத்து, உள்ளங்கையில் வைத்து வட்டமாகத் தட்டவும். தட்டிய மாவின் நடுவில், தயாரித்து வைத்த பூரணத்தை ஒரு தேக்கரண்டி அளவு வைக்கவும்.

மாவின் ஓரங்களை மெதுவாக ஒன்றிணைத்து, பூரணம் வெளியே வராதவாறு கொழுக்கட்டை வடிவம் கொடுக்கவும். இதேபோல அனைத்து மாவையும் பூரணம் வைத்து கொழுக்கட்டைகளாக பிடிக்கவும். ஒரு இட்லி பாத்திரத்தில் தண்ணீர் ஊற்றி சூடாக்கவும். இட்லி தட்டில் நெய் தடவி, கொழுக்கட்டைகளை ஒன்றன் மீது ஒன்று படியாதவாறு வைக்கவும்.

இட்லி பாத்திரத்தில் தட்டுகளை வைத்து, மூடி போட்டு 10 முதல் 12 நிமிடங்கள் வரை மிதமான தீயில் வேக வைக்கவும். சுவையான மற்றும் மிருதுவான கொழுக்கட்டை தயாராகிவிட்டது. விநாயகர் சதுர்த்திக்கு இந்த எளிமையான செய்முறையை முயற்சி செய்து பாருங்கள்.