தினமும் காலையில் கால் ஸ்பூன் சுக்கு பொடி; எடை குறைய இத்தனை நாள் சாப்பிடுங்க: டாக்டர் மைதிலி

இன்றைய காலக்கட்டத்தில் பலரும் சந்திக்கும் முக்கிய பிரச்னைகளில் ஒன்று உடல் எடை அதிகரிப்பு. மாறி வரும் உணவு பழக்க வழங்கங்களும் இதற்கு ஒரு காரணம் என்று சொல்லப்படுகிறது. உடல் எடை அதிகரிப்பால் அவதிப்படும் பலரும் எடையை குறைக்க, பல வழிகளில் முயற்சித்து வருகின்றனர். அதிலும் குறிப்பாக, ஆங்கில மருத்துவத்தை நாடிச்செல்லும் வழக்கம் நம்மில் பலருக்கும் உண்டு.

அதே சமயம், நாம் சமையலுக்கு பயன்படுத்தும், மசாலா பொருட்கள் மற்றும் நமக்கு இயற்கையில் கிடைக்கும் மூலிகைகளை வைத்தே உடலில் ஏற்படும் அனைத்து பிரச்னைகளுக்கும் தீர்வு காணலாம் எனபது பலரும் அறிந்திடாத ஒரு தகவலாக உள்ளது. அந்த வகையில் இந்த பதிவில், உடல் எடையை குறைக்க, நாம் சாதாரணமாக வீட்டில் பயன்படுத்தப்படும், சுக்கு (காய்ந்த இஞ்சி) வைத்து எப்படி செய்யலாம் என்பதை பார்ப்போம்.

இது குறித்து டாக்டர் மைதிலி தனது வீடியோவில், ஒற்றை தலைவலி இருப்பவர்களுக்கு, சுக்கு மிக முக்கியமான மருத்துவ பொருளாக உள்ளது. ஒற்றை தலைவலி பாதிப்பானால் அவதிப்படுபவர்கள், சுக்குப்பொடி 3 சிட்டிகையுடன் தென் கலந்து, காலை சாப்பாட்டுக்கு அரைமணி நேரம் முன்னதாக இரவு சாப்பாட்டுக்கு அரைமணி நேரம் முன்னதாக சாப்பிட்டு வந்தால், ஒற்றை தலைவலி படிப்படியாக குறையும். இது மட்டுமல்லாமல் சைனஸ் பிரச்னையும் சுக்கு தீர்க்கும்.

நாட்டு மருந்து கடைகளில் கிடைக்கும் சுக்கு தைலத்தை தலை குளிப்பதற்கு 45 நிமிடங்களுக்கு முன்னதாக உச்சந்தலையில் தேய்த்துவிட்டு, அதன்பிறகு வெந்நீரில் தலைக்கு குளிக்க வேண்டும். இப்படியே வராத்திற்கு ஒருமுறை செய்து வந்தால், சைனஸ் பிரச்னையும் நீங்கும். அதேபோல் பயணங்களின்போது வாந்தி மற்றும் மயக்கத்தினால் அவதிப்படுபவர்கள், சுக்குப்பொடியை 2 சிட்டிகை எடுத்து வெந்நீரில் கலந்து, பயணம் செய்வதற்கு அரைமணி நேரம் முன்னதாக குடித்துவிட வேண்டும். இப்படி செய்தால், வாந்தி மயக்கம் வராது.

சுக்கு என்பது உடல் எடையை குறைப்பதற்கும் அதிகமாக பயன்படுகிறது. உடலில் இருக்கும் கெட்ட கொழுப்புகளை நீக்கும் திறன் கொண்டது சுக்கு. கால் டீஸ்பூன் அளவுக்கு சுக்கு பொடி எடுத்து ஒரு க்ளாஸ் வெந்நீரில், கலந்து காலை உணவுக்கு அரைமணி நேரத்திற்கு முன்னதாக குடித்துவிட வேண்டும். காலையில் டீ, காபி குடிக்கும் பழக்கம் இருந்தால் அதற்கு பதிலாக நீங்கள் இதை குடிக்கலாம். 30-45 நாட்கள் தொடர்ந்து சாப்பிட்டு வந்தால் உடல் எடையில் மாற்றம் ஏற்படுவதை பார்க்கலாம் என்று கூறியுள்ளார். 

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.