ஈரல் பிரச்சனை டூ துல்லியமான பார்வை... இந்தக் காயில் டிஷ்; ருசியோ ருசி!

நம் சமையலில் காலம் காலமாகப் பயன்படுத்தப்பட்டு வரும் காய்கறிகளில் பீர்க்கங்காய்க்கு ஒரு சிறப்பான இடம் உண்டு. இது வெறும் காய் மட்டுமல்ல, எண்ணற்ற ஆரோக்கிய நன்மைகளைக் கொண்ட ஒரு பொக்கிஷம். இன்று, இந்த எளிமையான பீர்க்கங்காயை வைத்து, அனைவரும் விரும்பி உண்ணக்கூடிய ஒரு அருமையான மசியல் செய்வது எப்படி என்று பார்ப்போம். இது சாதம், ராகி உருண்டை, இட்லி, தோசை அல்லது சப்பாத்தி என எதனுடனும் சேர்த்து சாப்பிட ஏற்றது.

தேவையான பொருட்கள்:

வேர்க்கடலை எண்ணெய் - 1 தேக்கரண்டி

கடுகு - 1 தேக்கரண்டி

உளுத்தம் பருப்பு - 1 தேக்கரண்டி

பூண்டு - 7-8 பல்

பச்சை மிளகாய் - 5-7 (உங்கள் காரத்திற்கேற்ப)

பெரிய வெங்காயம் - 1 (நறுக்கியது)

பீர்க்கங்காய் - 2 கப் (நறுக்கியது)

தக்காளி - 4 (நறுக்கியது)

மஞ்சள் தூள் - 1/2 தேக்கரண்டி

உப்பு - தேவையான அளவு

கொத்தமல்லி இலை - 1 கைப்பிடி

நெய் - 2 தேக்கரண்டி

செய்முறை:

ஒரு மண் சட்டியில் (அல்லது அடிகனமான கடாயில்) எண்ணெய் ஊற்றி, கடுகு மற்றும் உளுத்தம் பருப்பு சேர்க்கவும். கடுகு வெடித்ததும், பூண்டு மற்றும் பச்சை மிளகாய் சேர்த்து ஒரு நிமிடம் வதக்கவும்.

அடுத்து வெங்காயம், தக்காளி, பீர்க்கங்காய், மஞ்சள் தூள் மற்றும் உப்பு சேர்த்து தண்ணீர் சேர்க்காமல் நன்கு கிளறவும். சட்டியை மூடி வைத்து, காய்கள் மென்மையாக வேகும்வரை சமைக்கவும். பீர்க்கங்காய்யில் வரும் தண்ணீரே காய் வேகுவதற்கு சரியாக இருக்கும்.

காய்கள் வெந்ததும், ஒரு கைப்பிடி கொத்தமல்லி இலைகளைச் சேர்த்து, லேசாக மசிக்கவும். மசியல் முழுமையாகக் கூழாகாமல், சற்று கெட்டியான பதத்தில் இருக்க வேண்டும். கடைசியாக, 2 தேக்கரண்டி நெய் சேர்த்து, சூடாகப் பரிமாறவும்.

View this post on Instagram

A post shared by Kayus Kitchen (@kayus_kitchen)

பீர்க்கங்காய் அதிக நீர்ச்சத்து கொண்ட காய்கறி. இது உடல் வெப்பநிலையைக் குறைத்து, கோடைகாலத்தில் உடலை நீரேற்றமாக வைத்திருக்க உதவுகிறது. இதில் கலோரிகள் மிகக் குறைவு மற்றும் நார்ச்சத்து நிறைந்துள்ளது. இது நீண்ட நேரம் வயிறு நிறைந்த உணர்வைத் தந்து, அதிக பசியைத் தடுக்கிறது. இதன் மூலம் எடை இழப்புக்கு உதவுகிறது. இதில் வைட்டமின் ஏ நிறைந்துள்ளதால், கண் பார்வையை மேம்படுத்தி, முதுமையில் ஏற்படும் கண் பிரச்சனைகளைத் தடுக்க உதவுகிறது.

பீர்க்கங்காய் கல்லீரலின் ஆரோக்கியத்தை மேம்படுத்தி, பித்தப்பை சீராக செயல்பட உதவுகிறது. இது குடல் ஆரோக்கியத்தைப் பராமரிக்க உதவுவதால், சருமத்தில் ஏற்படும் பிரச்சனைகளைத் தடுக்கிறது. குடல் ஆரோக்கியமாக இருந்தால், சருமமும் ஆரோக்கியமாக இருக்கும்.