ஈஸி லஞ்ச் ரெசிபி: இனி ஸ்கூல், ஆபிசுக்கு இந்த மாதிரி செய்து குடுங்க; பாக்ஸ் டக்குன்னு காலி!

நெய்சோறுடன் தொட்டுக்கொள்ள ஏதேனும் ஒரு காம்பினேஷனை முயற்சி செய்திருக்கிறீர்களா? இல்லையென்றால், இந்த ரெசிபியை ட்ரை பண்ணி பாருங்க.

தேவையான பொருட்கள்:

நெய் - 3 டீஸ்பூன்

எண்ணெய் - சிறிது

பட்டை, கிராம்பு, ஏலக்காய், பிரியாணி இலை - தாளிக்கத் தேவையான அளவு

வெங்காயம் - 1 (நறுக்கியது)

இஞ்சி பூண்டு விழுது - 1 டீஸ்பூன்

பச்சை மிளகாய் - 5 (கீறியது)

புதினா இலைகள் - ஒரு கைப்பிடி

தக்காளி - 1 (சிறியது, புளிப்புக்கு மட்டும்)

தேங்காய்ப்பால் - 1.5 கப்

அரிசி ஊறவைத்த தண்ணீர் - 1.5 கப்

உப்பு - தேவையான அளவு

அரிசி - 1.5 கப் (ஊறவைத்தது)

கொத்தமல்லி இலைகள் - அலங்கரிக்க

செய்முறை:

ஒரு பாத்திரத்தில் மூன்று டீஸ்பூன் நெய் மற்றும் சிறிது எண்ணெய் சேர்த்து சூடாக்கவும். பட்டை, கிராம்பு, ஏலக்காய், பிரியாணி இலை சேர்த்து தாளிக்கவும். நறுக்கிய வெங்காயம் சேர்த்து, கண்ணாடி பதம் வரும் வரை வதக்கவும்.

ஒரு டீஸ்பூன் இஞ்சி பூண்டு விழுது சேர்த்து, பச்சை வாசனை போக வதக்கவும். கீறிய பச்சை மிளகாயை (நான் 5 சேர்த்துள்ளேன்) சேர்த்து நன்கு வதக்கவும். ஒரு கைப்பிடி நிறைய புதினா இலைகளைச் சேர்த்து நன்கு கலக்கவும். ஒரு சிறிய தக்காளி (புளிப்புக்காக மட்டும்) சேர்த்து வதக்கவும்.

View this post on Instagram

A post shared by Rekha S (@rekhascucina)

1.5 கப் தேங்காய்ப்பால் மற்றும் 1.5 கப் அரிசி ஊறவைத்த தண்ணீர் சேர்க்கவும். தேவையான அளவு உப்பு சேர்த்து நன்கு கலக்கவும். கலவை லேசாக கொதித்து, குமிழ்கள் வர ஆரம்பித்ததும், ஊறவைத்த அரிசியைச் சேர்க்கவும். 

அரிசியும் நீரும் சம நிலைக்கு வந்ததும், லேசாக கிளறி விடவும். மேலே கொத்தமல்லி இலைகளைத் தூவி, அடுப்பை குறைந்த தீயில் வைத்து, சுமார் 20 நிமிடங்கள் மூடி போட்டு வேக விடவும். இப்போது உங்கள் சுவையான நெய்சோறு தயாராகிவிடும்!