வெந்நீருடன் நெய்... சாஃப்ட் இடியாப்பத்துக்கு இது கேரண்டி!

தினமும் இட்லி, தோசை, பூரி, சப்பாத்தி என ஒரே வகையான டிபன் சாப்பிட்டு சலித்துப் போனவர்களுக்கு, இந்த ராகி இடியாப்பம் ஒரு ஆரோக்கியமான மற்றும் சுவையான மாற்றாக இருக்கும். இதைச் செய்வது மிகவும் எளிது, மேலும் இதன் சுவை உங்களை ஆச்சரியப்படுத்தும்.

தேவையான பொருட்கள்:

ராகி மாவு - 2 கப்

தண்ணீர் - 2 முதல் 2.5 கப் (தேவைக்கேற்ப)

உப்பு - 1/2 டீஸ்பூன்

நெய் - 1 டீஸ்பூன்

தேங்காய்ப் பூ (விரும்பினால்)

செய்முறை:

முதலில், 2 கப் ராகி மாவை ஒரு வாணலியில் எண்ணெய் சேர்க்காமல், மிதமான தீயில் 2-3 நிமிடங்கள் வாசனை வரும் வரை வறுத்து தனியே எடுத்து வைத்துக் கொள்ளவும். மாவு கருகி விடாமல் பார்த்துக் கொள்ளவும்.

அதே வாணலியில், 2 கப் தண்ணீர் சேர்த்து, அதனுடன் அரை டீஸ்பூன் உப்பு மற்றும் ஒரு டீஸ்பூன் நெய் சேர்த்து நன்றாக கொதிக்க விடவும். தண்ணீர் கொதித்து குமிழ்கள் வர ஆரம்பித்ததும், அடுப்பை குறைந்த தீயில் வைத்து, வறுத்து வைத்துள்ள ராகி மாவை கொஞ்சம் கொஞ்சமாக சேர்த்து, கட்டி இல்லாமல் நன்றாக கிளறவும்.

மாவு நன்றாக கலந்து, கட்டிகள் இல்லாமல் வந்ததும், அடுப்பை அணைத்து, மாவை மூடி போட்டு கைப் பொறுக்கும் சூடு வரும் வரை அப்படியே விடவும். மாவு ரூம் டெம்பரேச்சருக்கு வந்ததும், மாவில் சிறிது சிறிதாக தண்ணீர் தெளித்து, (கால் கப் வரை தேவைப்படலாம்) மாவை மென்மையாகும் வரை நன்றாக பிசையவும். மாவு மிகவும் மிருதுவாக இருக்க வேண்டும்.

View this post on Instagram

A post shared by malini (@malinikichen)

பிசைந்த மாவை இடியாப்ப அச்சில் தேவையான அளவு எடுத்து, இடியாப்ப ஸ்டீமரிலோ அல்லது இட்லி தட்டிலோ பிழிந்து கொள்ளவும். பிழிந்த இடியாப்பங்களை 5-7 நிமிடங்கள் ஆவியில் வேக விடவும். அவ்வளவுதான்! சுவையான மற்றும் சத்தான ராகி இடியாப்பம் தயார். இதை தேங்காய்ப் பூவுடன் சேர்த்து பரிமாறலாம். இந்த ஆரோக்கியமான ராகி இடியாப்பத்தை நீங்களும் உங்கள் வீட்டில் செய்து பாருங்கள்