சுவையும், சத்தும் நிறைந்த ஸ்நாக்ஸ்... பாரம்பரிய சுவையில் ராகி பணியாரம்

ராகி பணியாரம், நமது பாரம்பரிய உணவு வகைகளில் ஒன்று. இது சுவைக்கும், ஆரோக்கியத்திற்கும் சிறந்த ஒரு தேர்வாகும். முக்கியமாக, இதில் பயன்படுத்தப்படும் கேழ்வரகு (ராகி), உடலுக்குத் தேவையான ஊட்டச்சத்துக்கள், நார்ச்சத்து மற்றும் கால்சியம் போன்றவற்றை மிகுதியாகக் கொண்ட ஒரு தானியமாகும். இது குழந்தைகள் முதல் பெரியவர்கள் வரை அனைவருக்கும் ஏற்ற ஒரு சத்தான உணவாகும். இதனை எப்படி செய்வது என்று ஹோம் குக்கிங் தமிழ் யூடியூப் பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

கேழ்வரகு மாவு: 1 கப் (250 மில்லி)
அரிசி மாவு: 1/4 கப்
வெல்லம்: 1 கப்
தேங்காய்: 1/2 கப்
உப்பு: 1/4 டீஸ்பூன்
ஏலக்காய் தூள்: 1 டீஸ்பூன்
முந்திரி: சுமார் 10 
சமையல் சோடா: 1/4 டீஸ்பூன்
நெய்: தேவையான அளவு
தண்ணீர்: தேவையான அளவு

செய்முறை:

ராகி பணியாரம் செய்வது மிகவும் எளிது. முதலில் ஒரு பாத்திரத்தில் கேழ்வரகு மாவு மற்றும் அரிசி மாவு ஆகியவற்றைச் சேர்த்து நன்றாகக் கலக்கவும். பின்னர், துருவிய வெல்லம் மற்றும் தேங்காய் சேர்த்து மீண்டும் கலக்கவும். இந்தக் கலவையில் கொஞ்சம் கொஞ்சமாக தண்ணீர் சேர்த்து, கட்டி இல்லாமல் தோசை மாவு பதத்திற்கு, மிருதுவான மாவாகக் கலக்கவும். மாவு கெட்டியாகவோ அல்லது நீர்த்துப்போகவோ இருக்கக்கூடாது.

மாவு தயாரானதும், அதனுடன் உப்பு, ஏலக்காய் தூள், மற்றும் விருப்பப்பட்டால் நறுக்கிய முந்திரி ஆகியவற்றைச் சேர்த்து நன்கு கலக்கி, சுமார் 10 நிமிடங்கள் அப்படியே ஊற விடவும். பணியாரம் ஊற்றுவதற்குச் சரியாக முன், கலந்த மாவில் சமையல் சோடா சேர்த்து நன்றாகக் கலக்கவும்.

இப்போது, பணியாரம் செய்யும் சட்டியை அடுப்பில் வைத்து சூடாக்கி, ஒவ்வொரு குழியிலும் சிறிது நெய் சேர்க்கவும். ஒரு சிறிய கரண்டியால் மாவை எடுத்து, குழிகளின் முக்கால் பாகம் நிரப்பவும். சுமார் ஒரு நிமிடம் கழித்து, ஒரு குச்சி அல்லது கரண்டியின் உதவியுடன் பணியாரத்தைத் திருப்பிப் போட்டு, மறுபுறமும் வேக விடவும். இரண்டு பக்கமும் பொன்னிறமாக வெந்ததும், சூடான பணியாரத்தை எடுத்துப் பரிமாறலாம். சுவையான மற்றும் ஆரோக்கியமான ராகி பணியாரம் இப்போது தயார்.