டேஸ்டியான துவையல்... ஒரு தட்டு சோறு கூட காலியாகிவிடும்

வெண்டைக்காய் துவையல் வழவழப்பாக எப்போதும் போல் இல்லாமல் ஒரு நல்ல சுவையை கொடுக்கும். இது இட்லி, தோசை, சாதம் போன்றவற்றுடன் சேர்த்து சாப்பிட மிகவும் ஏற்றது. இதில் நார்ச்சத்து அதிகம் உள்ளது. இதைச் செய்வது மிகவும் எளிது, அதுமட்டுமின்றி இதில் வழவழப்புத்தன்மை இல்லாமல் நல்ல சுவையில் இருக்கும். மேலும் இதன் தனித்துவமான சுவை எல்லோரையும் கவரும்.

தேவையான பொருட்கள்:

வெண்டைக்காய் - 200 கிராம்
சின்ன வெங்காயம் - 100 கிராம்
பூண்டு - 5 பல்
காய்ந்த மிளகாய் - 3 முதல் 4 (காரத்திற்கு ஏற்ப)
புளி - சிறிய நெல்லிக்காய் அளவு
தேங்காய் துருவல் - 2 டேபிள் ஸ்பூன்
கடுகு - 1 டீஸ்பூன்
உளுத்தம் பருப்பு - 1 டீஸ்பூன்
கறிவேப்பிலை - சிறிதளவு
எண்ணெய் - 2 டேபிள் ஸ்பூன்
உப்பு - தேவையான அளவு

செய்முறை:

முதலில் வெண்டைக்காயை நன்றாகக் கழுவி, ஈரம் இல்லாமல் துடைத்து, வட்டமாக நறுக்கிக் கொள்ளவும். ஒரு கடாயில் சிறிதளவு எண்ணெய் விட்டு, நறுக்கிய வெண்டைக்காயை சேர்த்து, அதன் பிசுபிசுப்பு தன்மை போகும் வரை வதக்கவும். வதக்கிய வெண்டைக்காயை தனியாக ஒரு தட்டில் எடுத்து வைக்கவும்.

அதே கடாயில், மீதமுள்ள எண்ணெய் சேர்த்து, காய்ந்த மிளகாய், பூண்டு மற்றும் சின்ன வெங்காயம் சேர்த்து வதக்கவும். வெங்காயம் பொன்னிறமாக வதங்கியதும், அடுப்பை அணைத்து விடவும். வெங்காயம், பூண்டு கலவையுடன், வதக்கிய வெண்டைக்காய், புளி, தேங்காய் துருவல் மற்றும் தேவையான அளவு உப்பு சேர்த்து, மிக்ஸியில் கொரகொரப்பாக அரைக்கவும். தேவைப்பட்டால் சிறிதளவு தண்ணீர் சேர்க்கலாம்.

ஒரு சிறிய தாளிப்பு கடாயில், சிறிதளவு எண்ணெய் விட்டு, கடுகு, உளுத்தம் பருப்பு மற்றும் கறிவேப்பிலை சேர்த்து தாளித்து, அதை அரைத்து வைத்த துவையலின் மேல் ஊற்றி பரிமாறவும். சுவையான வெண்டைக்காய் துவையல் தயார். நீங்கள் இதை சாதம், இட்லி அல்லது தோசையுடன் சேர்த்து சுவைக்கலாம். அதுமட்டுமின்றி இந்த கடையல் சின்ன பிள்ளைகளுக்கு கூட பிடிக்கும். வழவழப்புத் தன்மையால் துவையல் வேண்டாம் என்று சொல்பவர்கள் கூட இந்த மாதிரி செய்து கொடுத்தால் நிறைய சாப்பிடுவார்கள்.